امریکا نے برڈ فلو کے دوران ترکیہ اور جنوبی کوریا سے انڈے درآمد کرنا شروع کر دیے
امریکی وزیر زراعت نے کہا ہے کہ امریکا، ترکیہ اور جنوبی کوریا سے انڈے درآمد کرے گا تاکہ ایویئن فلو سے پیدا ہونے والی رسد کی قلت کو کم کیا جا سکے جس کی وجہ سے ملک بھر میں انڈوں کی قیمتوں میں اضافہ ہوا ہے۔
ڈان اخبار میں شائع غیر ملکی خبر رساں ادارے ’اے ایف پی‘ کی رپورٹ کے مطابق بروک رولنز نے واشنگٹن میں صحافیوں کو بتایا کہ ترکیہ اور جنوبی کوریا سے درآمدات پہلے ہی شروع ہو چکی ہیں اور وائٹ ہاؤس دیگر ممالک سے بھی انڈے عارضی طور پر درآمد کرنے کے بارے میں بات چیت کر رہا ہے۔
انہوں نے مزید کہا کہ ہم مختصر مدت کے لیے لاکھوں انڈوں کے لیے بات کر رہے ہیں۔
امریکا میں برڈ فلو پھیلنے کی وجہ سے انڈوں کی قیمت آسمان کو چھو رہی ہے، جس کی وجہ سے کسانوں کو 3 کروڑ پرندوں کو مارنے پر مجبور ہونا پڑا ہے، اور سپلائی میں تیزی سے رکاوٹ پیدا ہوئی ہے۔
پولینڈ کے نیشنل چیمبر آف پولٹری اینڈ فیڈ پروڈیوسرز کی ڈائریکٹر کٹرزینا گاورونسکا نے حال ہی میں کہا کہ بہت سے ممالک میں انڈوں کی کمی ہے، اہم سوال یہ ہوگا کہ امریکیوں کی جانب سے کیا مالی حالات پیش کیے جائیں گے؟
جمعہ کے روز صحافیوں سے بات کرتے ہوئے بروک رولنز نے کہا کہ انڈوں کی درآمد وقت کے لحاظ سے محدود ہوگی اور امریکی پولٹری فارمرز کی جانب سے سپلائی بڑھانے کے بعد یہ بند ہو جائے گی۔