ڈیفنس میں نوجوان پر تشدد، سلمان فاروقی کا 2 روزہ جسمانی ریمانڈ منظور
کراچی کی مقامی عدالت نے ڈیفنس میں با اثر شخص کی جانب سے نوجوان پر تشدد کے کیس میں ملزم سلمان فاروقی کو 2 روزہ جسمانی ریمانڈ منظور کرلیا۔
ڈان نیوز کے مطابق کراچی کی ضلع جنوبی کی عدالت نے آئندہ سماعت پر مقدمے کی رپورٹ طلب کرلی۔
اس سے قبل جب پولیس ملزم کو ریمانڈ کے لیے عدالت لائی تو وکیل نے احاطہ عدالت میں ملزم سلمان فاروقی کو تھپڑ مار دیا جب کہ تھپڑ لگنے کے بعد پولیس اہلکار ملزم کو بھگاکر لے گئے۔
دوسری جانب، ملزم کے تشدد کی شکار فیملی بھی منظر عام پر آگئی۔
متاثرہ نوجوان نے ویڈیو بیان میں بتایا کہ خیابان اتحاد میں دونوں بہنوں کو لینے جارہا تھا جیسے ہی بہنوں کے قریب پہنچا تو گاڑی سے ٹکر ہوگئی، اس دوران گاڑی میں سوار شخص نے تشدد کرنا شروع کردیا۔
بعد ازاں، کراچی کی مقامی عدالت نے ڈیفنس میں نوجوان شہری کو تشدد کا نشانہ بنانے کے مقدمے میں سلمان فاروقی سمیت دو ملزمان کو دو روزہ جسمانی ریمانڈ پر پولیس کے حوالےکردیا۔
واضح رہے کہ گزشتہ روز کراچی کے پوش علاقے گذری ڈیفنس میں گاڑی اور موٹر سائیکل میں تصادم کے بعد کار سوار بااثر شخص طیش میں آگیا تھا، اور موٹر سائیکل سوار شہری کو زد و کوب کیا اور تشدد کا نشانہ بنایا تھا۔
نوجوان کے ساتھ موجود اس کی بہنیں بااثر شخص کے سامنے ہاتھ جوڑ جوڑ کر معافیاں مانگتی رہیں، لیکن روتی لڑکیوں کے آنسوؤں پر بھی بااثر شخص کو ترس نہیں آیا تھا۔
سوشل میڈیا پر ویڈیو وائرل ہونے کے بعد پولیس نے بااثر ملزم سلمان فاروقی کو گرفتار کرلیا تھا جسے آج سٹی کورٹ میں قائم ضلع جنوبی کی عدالت میں پیش کیا گیا۔