نیتن یاہو کا ایران کیخلاف جاری جنگ میں ساتھ دینے پر ٹرمپ کا شکریہ
اسرائیلی وزیر اعظم نیتن یاہو نے امریکی صدر ڈونلڈ ٹرمپ کا ایران کے خلاف جاری جنگ میں اسرائیل کا ساتھ دینے پر شکریہ ادا کیا ہے۔
امریکی نیوز چینل ’سی این این‘ کے مطابق اسرائیلی وزیراعظم کے دفتر سے جاری ویڈیو پیغام میں نیتن یاہو کا کہنا تھا کہ اسرائیل کے فضائی دفاع میں جو مدد امریکا فراہم کر رہا ہے، اس پر ہم صدر ٹرمپ کے شکر گزار ہیں۔
انہوں نے بتایا کہ دونوں رہنماؤں کے درمیان باقاعدگی سے بات چیت ہوتی رہی ہے جب کہ گزشتہ رات ہی سچویشن روم میں میٹنگ کے بعد امریکی صدر سے ’انتہائی گرمجوشی‘ سے گفتگو ہوئی تھی۔
اپنے ویڈیو پیغام میں اسرائیلی وزیراعظم نے کہا کہ میں ٹرمپ کا حمایت پر شکریہ ادا کرنا چاہتا ہوں۔
انہوں نے زور دے کر کہا کہ اسرائیل “ آیت اللہ خامنہ ای کے نظام پر شدید ضرب لگا رہا ہے اور ایران کے جوہری تنصیبات، میزائلوں اور ’طاقت کی علامتوں‘ کو نشانہ بنا رہا ہے۔
اس سے قبل، صحافیوں سے گفتگو کے دوران ڈونلڈ ٹرمپ نے ایران کے خلاف اسرائیل کی جانگ میں امریکی فوجی مداخلت سے متعلق کوئی واضح جواب نہیں دیا۔
وائٹ ہاؤس میں میڈیا سے گفتگو کے دوران جب امریکی صدر سے سوال کیا گیا کہ کیا وہ ایران کے خلاف اسرائیلی حملوں میں شریک ہونے جار رہے ہیں؟
انہوں نے جواب دیا کہ ’میں شاید ایسا کروں یا پھر شاید ایسا نہ کروں‘، کوئی نہیں جانتا کہ میں کیا کرنے جارہا ہوں، میں صرف یہ کہہ سکتا ہوں کہ ایران شدید مشکلات میں ہے اور مذاکرات کرنا چاہتا ہے۔