ثمر جعفری کے ساتھ اپنی جوڑی بنانے پر کوئی اعتراض نہیں، عینا آصف
ابھرتی ہوئی اداکارہ و ماڈل عینا آصف نے کہا ہے کہ انھیں اپنے ساتھی اداکار ثمر جعفری کے ساتھ اپنی جوڑی بنائے جانے پر کوئی اعتراض نہیں ہے۔
عینا آصف نے حال ہی میں حسن چوہدری کے پروگرام میں شرکت کی، جہاں انہوں نے مختلف معاملات پر کھل کر گفتگو کی۔
ایک سوال کے جواب میں اداکارہ نے کہا کہ ڈراما سیریل ’پرورش‘ میں اُن کی اداکاری کی تعریف کی جارہی ہے، جس کا پورا کریڈٹ وہ ڈرامے کے ہدایتکار میثم نقوی کو دینا چاہتی ہیں، کیونکہ وہ سمجھتی ہیں کہ یہ ڈراما اُن کی وجہ سے ہی اتنا اچھا تشکیل دیا گیا ہے۔
انہوں نے کہا کہ ہدایتکار نے انہیں ڈراما سیریل ’مائی رے‘ میں کام کے دوران سمجھایا تھا کہ کس طرح ایک اداکار کو اپنی شخصیت سے باہر آکر دوسرے کردار میں خود کو ڈھالنا ہوتا ہے اور یہی ایک اداکار کی خاصیت ہوتی ہے۔
اداکارہ کے مطابق ’پرورش‘ نوجوانوں اور جین-زی میں اس لیے زیادہ مقبول ہورہا ہے کیونکہ اس کی کہانی میں نوجوانوں کے مسائل دکھائے گئے ہیں اور جین-زی یہ ڈراما دیکھنے کے بعد خود کو اس کی کہانی سے کافی قریب محسوس کررہے ہیں۔
عینا آصف نے اداکار ثمر جعفری کے ساتھ اپنی دوستی کے حوالے سے بتاتے ہوئے کہا کہ وہ اُن کے بہت اچھے دوست ہیں اور اُن کی دوستی ابھی بھی قائم ہے۔
ان کا کہنا تھا کہ اس دوستی کی ایک بڑی وجہ یہ بھی ہے کہ اُن دونوں کی امی ایک ہی کالج سے تعلیم حاصل کرچکی ہیں اور اسی وجہ سے اُن کی فیملیز بھی ایک دوسرے کو اچھے سے جانتی ہیں، اس لیے اُن کا رشتہ بہت پرانا ہے۔
عینا آصف نے کہا کہ انہیں ثمر کے ساتھ اپنی جوڑی بنائے جانے پر کوئی اعتراض نہیں کیونکہ وہ ان کے اچھے دوست ہیں اور وہ اس رشتے کو سمجھتی ہیں، البتہ اگر یہ سب کسی اور اداکار کے ساتھ ہو جس کے ساتھ وہ کام کررہی ہوں، تو وہ خود کو غیر آرام دہ محسوس کریں گی۔