نیٹو اجلاس کے بعد وائٹ ہاؤس نے ٹرمپ کیلئے ’ڈیڈی‘ کا لقب اپناکر ویڈیو جاری کردی
وائٹ ہاؤس نے امریکی صدر ڈونلڈ ٹرمپ کے لیے ’ڈیڈی‘ کا لقب اپناتے ہوئے ایک ویڈیو جاری کی ہے، جو نیٹو سربراہی اجلاس کے دوران نیٹو کے سیکریٹری جنرل مارک روٹے کے الفاظ پر مبنی ہے۔
خبر رساں ادارے رائٹرز کے مطابق وائٹ ہاؤس نے سوشل میڈیا پلیٹ فارم ایکس پر ’ڈیڈیز ہوم‘ کے عنوان سے ایک ویڈیو پوسٹ کی، جس میں گلوکار اُشر کا گانا’ہے ڈیڈی’بج رہا ہے اور ٹرمپ کی ہیگ میں منعقدہ نیٹو اجلاس میں شرکت کی جھلکیاں دکھائی گئی ہیں۔
نیٹو کے نئے سیکریٹری جنرل مارک روٹے نے بدھ کو نیٹو اجلاس کے موقع پر ٹرمپ کے ساتھ ایک ملاقات میں ’ڈیڈی‘ کا لفظ اس وقت استعمال کیا تھا جب ٹرمپ نے ایران اور اسرائیل کو جنگ بندی کی خلاف ورزیوں پر سخت زبان میں تنقید کا نشانہ بنایا تھا۔
روٹے نے ہنستے ہوئے کہا کہ ’اور پھر ڈیڈی کو بعض اوقات سخت زبان استعمال کرنی پڑتی ہے تاکہ وہ رک جائیں‘۔
یاد رہے کہ اس سے ایک دن قبل ٹرمپ نے کہا تھاکہ ’ایران اور اسرائیل اتنی دیر اور شدت سے لڑ رہے ہیں کہ اب اُنہیں خود بھی معلوم نہیں کہ وہ کیا کر رہے ہیں‘۔
بعد ازاں روئٹرز کو دی گئی ایک انٹرویو میں روٹے نے وضاحت کی کہ انہوں نے ٹرمپ کو براہ راست ’ڈیڈی‘ نہیں کہا تھا، بلکہ یہ اشارہ تھا کہ کچھ نیٹو اتحادی ممالک امریکا کو ایک باپ جیسا محافظ سمجھتے ہیں۔
انہوں نے کہاکہ یورپ میں بعض ممالک کہتے ہیں، ’مارک، کیا امریکا ہمارے ساتھ رہے گا؟‘ تو میں کہتا ہوں یہ بالکل ایسے لگتا ہے جیسے ایک بچہ اپنے والد سے پوچھتا ہے، ’کیا آپ ہمارے ساتھ ہی رہیں گے؟‘۔
انہوں نے کہا کہ میں نے اسی سیاق و سباق میں ’ڈیڈی‘ کا لفظ استعمال کیا تھا، میرا مطلب یہ نہیں تھا کہ میں صدر ٹرمپ کو ڈیڈی کہہ رہا ہوں۔“
جب ان سے پوچھا گیا کہ کیا اس کا مطلب یہ ہے کہ نیٹو کے دیگر رکن ممالک بچوں کی مانند ہیں جو اب دفاعی اخراجات بڑھانے کے وعدے کے بعد بالغ ہو رہے ہیں، تو روٹے نے جواب دیا کہ وہ پہلے ہی بالغ ہو چکے ہیں، لیکن اب انہیں آگے بڑھنا ہے اور امریکا کے ساتھ دفاعی اخراجات میں توازن پیدا کرنا ہے۔