جرمن پولیس پر حملہ کرنے والے افغان شخص کو گولی مار کر ہلاک کردیا گیا
جرمنی میں پولیس نے ایک افغان شہری کو اس وقت گولی مار کر ہلاک کردیا جب اس نے گرفتاری کی کوشش کرنے والے اہلکاروں پر چاقو سے حملہ کیا تھا جس کے نتیجے میں ایک پولیس افسر شدید زخمی ہو گیا۔
غیر ملکی خبررساں ادارے ’اے ایف پی‘ کے مطابق یہ واقعہ جنوبی جرمن شہر وانگن میں پیش آیا، جب 2 پولیس اہلکار 27 سالہ افغان شہری کو ایک حملے کے جرم میں سنائی گئی قید کی سزا کیلئے گرفتار کرنے سے کے گھر پہنچے۔
پولیس اور استغاثہ کی جانب سے جاری ایک مشترکہ بیان میں کہا گیا کہ آپریشن کے دوران افغان شہری نے اچانک چاقو سے پولیس اہلکاروں پر حملہ کردیا جس کے جواب میں اہلکاروں کو گولیاں چلانی پڑیں۔
پولیس کے مطابق افغان شہری کو بچانے کی تمام تر کوششوں کے باوجود وہ دم توڑ گیا جب کہ شہری کے اچانک حملے سے پولیس افسر کو چاقو کے کئی وار لگے جس سے وہ شدید زخمی ہوگئے تاہم ان کی حالت خطرے سے باہر ہے۔
دوسری جانب، پولیس کی جانب سے اسلحے کے استعمال کی تحقیقات شروع کر دی گئی ہیں۔
جرمنی میں حالیہ عرصے میں کئی سنگین حملے دیکھنے میں آئے ہیں، جن میں کچھ حملے تارکین وطن کی جانب سے کیے گئے ہیں، جن میں چاقو سے حملوں کو علاوہ عام شہریوں کو گاڑیوں سے روندنے کے واقعات شامل ہیں، جس کی وجہ سے ملک میں امیگریشن پر ایک شدید سیاسی بحث جاری ہے۔
جرمن چانسلر فریڈرش مرز نے غیرقانونی امیگریشن کے خلاف سخت اقدامات کا آغاز کیا ہے، جن میں جرمنی کی سرحد پر زیادہ تر دستاویزات کے بغیر آنے والے تارکین وطن کو واپس بھیجنے کا عمل شامل ہے۔