مسلسل دوسرے روز سونے کی قیمتوں میں ہزاروں روپے اضافہ ریکارڈ
ملک بھر میں مسلسل دوسرے روز سونے کی قیمتوں میں ہزاروں روپے کا بڑا اضافہ ہو گیا۔
سرکاری خبر رساں ادارے ’اے پی پی‘ کی رپورٹ کے مطابق آل پاکستان صرافہ جیمز اینڈ جیولرز ایسوسی ایشن نے بتایا کہ 24 قیراط فی تولہ سونا 6 ہزار 600 روپے مہنگا ہو کر 3 لاکھ 56 ہزار 800 روپے میں فروخت ہوا۔
اسی طرح 24 قیراط 10 گرام سونے کی قیمت 5 ہزار 658 روپے اضافے سے 3 لاکھ 5 ہزار 898 روپے ہو گئی جبکہ 22 قیراط 10 گرام سونا 5,186 روپے اضافے سے 2 لاکھ 80 ہزار 416 روپے تک جا پہنچا۔
ادھر، چاندی کی قیمتوں میں بھی اضافہ دیکھنے میں آیا اور فی تولہ چاندی 52 روپے بڑھ کر 3,834 روپے جبکہ 10 گرام چاندی 45 روپے اضافے کے ساتھ 3 ہزار 287 روپے میں فروخت ہوئی۔
ایسوسی ایشن کے مطابق عالمی مارکیٹ میں بھی سونے کی قیمت میں 66 ڈالر اضافہ ہوا، جس کے بعد یہ 3 ہزار 348 ڈالر فی اونس ہو گئی۔
واضح رہے کہ گزشتہ روز 24 قیراط فی تولہ سونے کی قیمت 800 روپے اضافے سے 3 لاکھ 50 ہزار 200 روپے ہو گئی تھی۔
اسی طرح 24 قیراط 10 گرام سونا 686 روپے اضافے کے ساتھ 3 لاکھ 240 روپے میں فروخت ہوا تھا، جبکہ 22 قیراط 10 گرام سونا 629 روپے مہنگا ہو کر 2 لاکھ 75 ہزار 230 روپے کا ہو گیا تھا۔