یورپی یونین نے یو اے ای کو منی لانڈرنگ کی ہائی رسک لسٹ سے نکال دیا
یورپی یونین نے متحدہ عرب امارات (یو اے ای) کا نام منی لانڈرنگ کی ہائی رسک ممالک کی فہرست سے نکال دیا۔
گلف نیوز کی رپورٹ کے مطابق یورپی یونین نے یو اے ای کو منی لانڈرنگ اور دہشت گردی کی مالی معاونت کے لیے ہائی رسک ممالک کی فہرست سے باضابطہ طور پر خارج کر دیا۔
متحدہ عرب امارات کی اعلیٰ مالیاتی ریگولیٹر نے اس فیصلے کو ملک کی بڑی قومی کامیابی قرار دیا۔
یو اے ای کے سینٹرل بینک کے گورنر اور نیشنل کمیٹی برائے انسداد منی لانڈرنگ و دہشت گردی کی مالی معاونت کے چیئرمین خالد محمد بالاما نے کہا کہ یہ فیصلہ ملک کی ’دور اندیش قیادت‘ اور طویل مدتی وژن کا عکاس ہے۔
خالد محمد بالاما کا کہنا تھا کہ نائب وزیر اعظم ووزیر خارجہ اسحٰق ڈار اور قومی انسداد منی لانڈرنگ حکمت عملی کی اعلیٰ کمیٹی کے چیئرمین شیخ عبداللہ بن زاید آل نہیان کی سفارتی کوششوں کے نیتجے میں یہ اہم پیش رفت ہوئی ہے۔
خیال رہے کہ یو اے ای نے حالیہ برسوں میں منی لانڈرنگ اور دہشت گردی کی مالی معاونت کے خلاف اپنے قانونی اور مالیاتی ڈھانچے میں جامع اصلاحات کی ہیں۔
ان کا کہنا تھا کہ یہ فیصلہ یو اے ای میں جدید مالیاتی نظام اور موثر گورننس کی بنیاد رکھنے کی سمت میں ایک اہم قدم ہے۔
انہوں نے زور دیا کہ یہ فیصلہ متحدہ عرب امارات کے مالیاتی نظام کو مزید مضبوط بنانے، شفافیت بڑھانے اور عالمی مسابقت کو فروغ دینے کے عزم کا اظہار ہے۔
مزید کہا کہ ہم اس پیش رفت کو ممکن بنانے میں ریگولیٹری اداروں، مالیاتی اداروں اور نجی شعبے کے تعاون کو سراہتے ہیں۔
واضح رہے کہ فیٹف نے فروری 2024 میں متحدہ عرب امارات کو گرے لسٹ سے نکالا تھا۔