پاکستان کی شام کے خلاف اسرائیلی جارحیت کی شدید مذمت
پاکستان نے شام پر اسرائیلی جارحیت کی شدید مذمت کا اظہار کرتے ہوئے شامی خودمختاری اور بین الاقوامی قانون کے احترام کا مطالبہ کردیا۔
ریڈیو پاکستان کی رپورٹ کے مطابق پاکستان نے شام کے خلاف اسرائیل کی جاری فوجی جارحیت کی شدید مذمت کی ہے، اسے نہ صرف غیر ذمہ دارانہ بلکہ خطرناک اور دانستہ طور پر عدم استحکام پیدا کرنے والا اقدام قرار دیا ہے۔
اقوام متحدہ کی سلامتی کونسل میں شام کی صورتِ حال پر بریفنگ کے دوران قومی مؤقف پیش کرتے ہوئے اقوام متحدہ میں پاکستان کے مستقل مندوب، سفیر عاصم افتخار احمد نے شام کی خودمختاری اور علاقائی سالمیت کی تمام خلاف ورزیوں کے فوری خاتمے کا مطالبہ کیا۔
ترک خبر رساں ادارے انادولو کے مطابق عاصم افتخار نے ان حملوں کو بین الاقوامی قانون کی سنگین اور دانستہ خلاف ورزی اور شدید اشتعال انگیز قرار دیا۔
انہوں نے کہا کہ شام اس وقت ایک نازک مگر اہم مرحلے سے گزر رہا ہے، انہوں نے عالمی برادری سے مطالبہ کیا کہ وہ شام کو بحالی کے لیے گنجائش مہیا کرے۔
ان کا کہنا تھا کہ ایسے ماحول میں اسرائیل کے جانب سے شامی ریاستی اداروں پر غیر ذمہ دارانہ حملے نہ صرف نقصان دہ ہیں بلکہ عقل سے بھی عاری ہیں۔
انہوں نے زور دیا کہ یہ استثنیٰ ختم ہونا چاہیے، اسرائیل کے اقدامات نہ صرف غیر قانونی ہیں بلکہ بالآخر خود اس کے لیے نقصان دہ ہیں، کیونکہ یہ وہی عدم استحکام پیدا کرتے ہیں جسے اسرائیل روکنے کا دعویٰ کرتا ہے۔ انہوں نے شام کے ساتھ مکمل یکجہتی کا اظہار کیا۔
عاصم افتخار نے کہا کہ اسرائیل کو جوابدہ نہ ٹھہرانے کے باعث خلاف ورزیاں مزید بڑھ گئی ہیں، اسرائیل کی خلاف ورزیاں اقوام متحدہ کے چارٹر اور عالمی قانون کے نظام کو کمزور کر رہی ہیں، اسرائیلی اقدامات خطے کو عدم استحکام سے دو چار کرنے کی کوشش ہے۔