کراچی: شہری کو مغوی بھتیجا مسجد کے باہر سے بھیک مانگتے ہوئے مل گیا، 3 اغوا کار گرفتار
کراچی میں شہری کو مغوی بھانجا شاہ لطیف ٹاؤن میں مسجد کے باہر بھیک مانگتے ہوئے مل گیا، پولیس نے اغوا میں ملوث میاں بیوی اور ان کے داماد کو گرفتار کرلیا۔
ڈان اخبار میں شائع رپورٹ کے مطابق پولیس نے دعویٰ کیا ہے کہ انہوں نے ایک جوڑے اور ان کے داماد کو ایک کم عمر بچے کے اغوا میں مبینہ طور پر ملوث ہونے پر گرفتار کر لیا ہے۔
کئی ماہ قبل لاپتا ہونے والا بچہ پیر کو کراچی کے شاہ لطیف ٹاؤن میں ایک مسجد کے باہر بھیک مانگتا ہوا ملا تھا۔
علاقے کے ایس ایچ او صدرالدین میرانی نے ڈان کو بتایا کہ 3 سالہ حسین علی کو سیکٹر اے-17 سے اغوا کیا گیا تھا، اور اہلِ خانہ نے 2 ماہ قبل نامعلوم افراد کے خلاف پاکستان پینل کوڈ کی دفعہ 363 (اغوا کی سزا) کے تحت ایف آئی آر نمبر 731/25 درج کرائی تھی۔
پولیس افسر کے مطابق پیر کو بچے کا ایک چچا نماز ادا کرنے کے لیے شاہ لطیف ٹاؤن کے سیکٹر اے-16 کی ایک مسجد میں گیا، جہاں اس نے اپنے لاپتا بھتیجے کو ایک شخص کے ساتھ مسجد کے باہر بھیک مانگتے ہوئے دیکھا، چچا اور اہل علاقہ نے اس شخص کو پکڑ لیا، اسے تشدد کا نشانہ بنایا اور پولیس کے حوالے کر دیا، گرفتار شخص کی شناخت شہریار کے طور پر ہوئی ہے۔
تفتیش کے دوران شہریار نے پولیس کو بتایا کہ یہ بچہ اسے اس کے سسرال والوں نے دیا تھا، ملزم کی فراہم کردہ معلومات کی بنیاد پر پولیس نے جوڑے کو بھی گرفتار کر لیا۔
میڈیا رپورٹس کے مطابق بچہ شاہ لطیف ٹاؤن میں ایک مقامی دکان سے واپس گھر آتے ہوئے اغوا ہوا تھا، اہلِ خانہ اپنے لاپتا بچے کی تلاش میں ہر ممکن کوشش کر رہے تھے اور بے حد پریشان تھے۔
اہل علاقہ نے میڈیا کو بتایا کہ ان کے علاقے سے پہلے بھی کئی بچے اغوا ہو چکے ہیں اور انہیں شبہ ہے کہ ان واقعات کے پیچھے کسی منظم اغوا کار گروہ کا ہاتھ ہو سکتا ہے۔
انہوں نے حکام سے مطالبہ کیا ہے کہ لاپتا بچوں کے معاملے کی مکمل اور شفاف تحقیقات کی جائیں۔