تھائی لینڈ کے دارالحکومت بینکاک کی مارکیٹ میں مسلح شخص کی فائرنگ، 6 افراد ہلاک
تھائی لینڈ کے دارالحکومت بینکاک میں پیر کے روز مسلح شخص نے مارکیٹ میں فائرنگ کر دی، جس کے نتیجے میں کم از کم 6 افراد ہلاک ہو گئے۔
برطانوی خبر رساں ادارے ’رائٹرز‘ کے مطابق میٹروپولیٹن پولیس بیورو کے ڈپٹی کمشنر چارن گوپتہ نے بتایا کہ مرنے والوں میں حملہ آور بھی شامل ہے، جس نے خودکشی کر لی۔
تھائی پولیس کے بیان کے مطابق پولیس اس شخص کی شناخت اور واقعے کے محرک کی تحقیقات کر رہی ہے، حملہ آور کے ہاتھوں ہلاک ہونے والے 5 افراد مارکیٹ کے سیکیورٹی گارڈز تھے۔
بینکاک کے ضلع بنگ سو کے پولیس اہلکار سانونگ سینگمانی نے کہا کہ فائرنگ کے واقعے میں کوئی سیاح ہلاک یا زخمی نہیں ہوا, یہ مارکیٹ بنیادی طور پر زرعی اجناس فروخت کرنے کے لیے جانی جاتی ہے۔
سیاحت تھائی لینڈ کی معیشت کا ایک کلیدی محرک ہے، جو جنوب مشرقی ایشیا کی دوسری بڑی معیشت ہے، جہاں معاشی ترقی سست روی کا شکار ہے، اور ایسے واقعات سیاحتی شعبے پر منفی اثر ڈال سکتے ہیں۔
پولیس کی جانب سے شیئر کی گئی ویڈیو فوٹیج میں، ایک مشتبہ شخص کو سفید ٹوپی پہنے اور سینے پر بیگ لٹکائے ہوئے مارکیٹ کی پارکنگ میں چلتے ہوئے دیکھا جا سکتا ہے۔
تھائی لینڈ میں اسلحے کا پھیلاؤ اور فائرنگ کے واقعات کوئی غیر معمولی بات نہیں، اکتوبر 2023 میں 14 سالہ لڑکے نے ترمیم شدہ ہینڈگن سے پرتعیش شاپنگ مال میں 2 افراد کو ہلاک اور 5 کو زخمی کر دیا تھا۔
2022 میں، ایک سابق پولیس اہلکار نے مشرقی تھائی لینڈ میں نرسری پر چاقو اور گن سے حملہ کر کے 36 افراد کو ہلاک کر دیا تھا، مرنے والوں میں 22 بچے بھی شامل تھے۔