وزیراعظم کا بڑھتی آبادی کے مسائل حل کرنے کیلئے خصوصی کمیٹی بنانے کا فیصلہ
وزیراعظم شہباز شریف نے ملک میں بڑھتی آبادی کے مسائل حل کرنے کے لیے خصوصی کمیٹی بنانے کا فیصلہ کیا ہے۔
ڈان نیوز کے مطابق وزیر اعظم کی زیرصدارت اہم اجلاس ہوا جس میں مختلف امور کا جائزہ لیا گیا، اجلاس میں وفاقی وزرا اور متعلقہ اداروں کے اعلیٰ حکام نے شرکت کی۔
اجلاس میں وفاقی وزیر منصوبہ بندی و ترقی ڈاکٹر احسن اقبال، وفاقی وزیر تعلیم ڈاکٹر خالد مقبول صدیقی، وفاقی وزیر اطلاعات و نشریات عطا اللہ تارڑ، وفاقی وزیر مذہبی امور سردار محمد یوسف، وفاقی وزیر قانون اعظم نذیر تارڑ اور متعلقہ اداروں کے اعلیٰ حکام بھی شریک تھے۔
اجلاس کے دوران بڑھتی آبادی سے جڑے مسائل کے حل کے لیے قومی سطح کی جامع پالیسی کے لیے بین الوزارتی کمیٹی قائم کرنے کا فیصلہ کیا گیا ۔
وزیر اعظم نے صوبوں سے مشاورت کے ساتھ مؤثر حکمت عملی بنانے کی ہدایت بھی کردی۔
اجلاس سے خطاب کرتے ہوئے وزیراعظم شہباز شریف کا کہنا تھا کہ پاکستان میں آبادی کے بڑھنے کی سالانہ شرح 2.55 فیصد ہے ، جس کو قومی ترقی کے تناظر میں ایک بڑا چیلنج قرار دیا گیا ہے۔
انہوں نے کہا کہ نوجوان ملک کا قیمتی اثاثہ ہیں، جنہیں قومی معیشت میں مؤثر کردار ادا کرنے کے لیے مواقع فراہم کیے جا رہے ہیں۔
شہباز شریف کا کہنا تھا کہ خواتین ہماری افرادی قوت کا بہت بڑا حصہ ہیں، ان کو ملازمت کے زیادہ سے زیادہ مواقع فراہم کرنے کے لیے اقدامات لیے جائیں۔
اجلاس کے دوران وزیراعظم نے بڑھتی ہوئی آبادی سے جڑے مسائل کے حل کے لیے قومی سطح کی جامع پالیسی تشکیل دینے کی ضرورت پر زور دیا۔