صحیح وقت پر سرمایہ کاری کریں، خالد انعم کا کسمپرسی کی حالت میں گزرجانے والے اداکاروں پر تبصرہ
سینئر اداکار و گلوکار خالد انعم نے کسمپرسی کی حالت میں دنیا سے گزر جانے والے اداکاروں پر تبصرہ کرتے ہوئے کہا کہ انہیں صحیح وقت پر سرمایہ کاری کرنی چاہیے تھی۔
حال ہی میں خالد انعم احمد علی بٹ کے پوڈکاسٹ میں شریک ہوئے، جہاں انہوں نے مختلف معاملات پر کھل کر گفتگو کی۔
ان کا کہنا تھا کہ انہیں زندگی میں کئی بار عشق ہوا ہے اور یہ اب بھی ہوسکتا ہے۔
انہوں نے کہا کہ عشق ایک چڑیا ہے اور حسن ایک درخت ہے، اسی لیے چڑیا کبھی کسی ڈال پر اور کبھی کسی اور ڈال پر بیٹھتی ہے اور انسان کے لیے عشق کرنا بہت ضروری ہے۔
اداکار نے کہا کہ ان کی اہلیہ ان کی بہت اچھی دوست ہیں، دونوں ایک دوسرے کو شادی سے پہلے تقریباً 10 سال سے جانتے تھے۔
انہوں نے کہا کہ شادی ہمیشہ بہترین دوست سے ہی کرنی چاہیے کیونکہ وہ آپ کے راز اپنے پاس محفوظ رکھتا ہے اور کسی اور کو نہیں بتاتا۔
خالد انعم کے مطابق نئے اداکار بہت سمجھدار ہیں اور صحیح وقت پر پیسوں کو صحیح جگہ پر لگاتے ہیں۔
انہوں نے کہا کہ اگر کوئی اداکار اس حالت میں فوت ہو جاتا ہے کہ دوا کے پیسے نہیں ہیں، تو یہ اس کی اپنی غلطی ہے کہ اس نے صحیح وقت پر سرمایہ کاری نہیں کی۔
خالد انعم نے مزید کہا کہ ہمیں بچپن سے ہی پیسوں کو جمع کرنے کا ہنر سیکھنا چاہیے اور مرد ہوں یا عورت، دونوں کو فارغ نہیں بیٹھنا چاہیے بلکہ کام کرتے رہنا چاہیے۔