بارشیں اور سیلاب، ماہرہ خان نے اپنا خوفناک تجربہ بیان کردیا
اداکارہ ماہرہ خان نے انکشاف کیا ہے کہ حالیہ بارشوں اور سیلاب کے سیزن میں نتھیا گلی سے واپسی پر وہ شدید خوف کا شکار رہیں، انہیں ڈر لگا رہا ہے کہ وہ سیلاب یا لینڈ سلائیڈنگ کا شکار بن جائیں گی۔
ماہرہ خان نے انسٹاگرام اسٹوری میں انکشاف کیا کہ وہ خیبر پختونخوا کے ضلع ایبٹ آباد کے سیاحتی مقام نتھیا گلی سے واپسی پر سیلاب اور لینڈ سلائیڈنگ کے خطرے کا شکار ہوئیں۔
اداکارہ نے اسٹوری میں بتایا کہ ایک روز قبل ہی وہ نتھیا گلی سے واپس آ رہیں تھیں تو راستے میں وہ شدید خوف شکار ہوئیں، انہوں نے خود کو بے بس محسوس کیا۔
ماہرہ خان نے لکھا کہ نتھیا گلی سے واپسی پر بار بار انہیں خوف آتا رہا کہ وہ سیلاب یا لینڈ سلائیڈنگ کا شکار ہو سکتی ہیں اور انہیں مذکورہ خوف آتے وقت سیلاب متاثرہ افراد کا خیال بھی آیا۔
اداکارہ نے لکھا کہ انہیں احساس ہے کہ سیلاب یا لینڈ سلائیڈنگ کی زد میں آنے والے افراد کس طرح بے بس ہوتے ہوں گے۔
اداکارہ نے لکھا کہ انہیں احساس ہے کہ کس طرح لوگ قدرتی آفات کے آگے بے بس ہوتے ہوئے، اپنی زندگیاں، اپنے پیارے اور گھر ڈوبتے ہوئے دیکھتے ہیں۔
ماہرہ خان نے ملک میں حالیہ بارشوں اور سیلاب کی تباہ کاریوں کے پیش نظر خدا سے رحم کی دعا بھی مانگی۔
اگرچہ اداکارہ نے بتایا کہ وہ نتھیا گلی سے واپسی پر شدید خوف کا شکار رہیں اور انہیں لگا کہ وہ سیلاب اور لینڈ سلائیڈنگ کا شکار بن سکتی ہیں، تاہم انہوں نے واضح طور پر اپنے ساتھ پیش آنے والے واقعے کی تفصیلات نہیں بتائیں۔
خیال رہے کہ پاکستان بھر میں شدید بارشوں کا سلسلہ جاری ہے جب کہ خیبرپختونخوا اور گلگت بلتستان میں بارشوں کے بعد سیلاب اور لینڈ سلائیڈنگ کے واقعات میں اب تک 400 سے زائد افراد لقمہ اجل بھی بن چکے ہیں۔
سندھ میں بھی بارشوں کا سلسلہ جاری ہے اور صوبائی دارالحکومت کراچی میں 19 اگست کو شدید بارشوں سے اربن فلڈنگ ہوگئی اور متعدد علاقوں میں پانی گھروں میں داخل ہوگیا۔