ملائیشیا: نماز جمعہ نہ پڑھنے والے مردوں پر قید اور بھاری جرمانے کا اعلان
ملائیشیا کی ایک ریاست میں شرعی عذر کے بغیر نماز جمعہ چھوڑنے والے مردوں کو 2 سال قید کا سامنا کرنا ہوگا اور 3 ہزار رنگٹ (تقریباً 2 لاکھ پاکستانی روپے) کا جرمانہ ادا کرنا ہوگا۔
العربیہ اردو کے مطابق قدامت پسند پان ملائیشین اسلامی پارٹی (پی ایس اے) کے زیر انتظام ریاست ترنگگانو میں یہ اعلان کیا گیا کہ بغیر کسی شرعی عذر کے نماز جمعہ چھوڑنے پر سخت سزا ہوگی۔
رپورٹ کے مطابق خلاف ورزی کرنے والوں کو شریعت کرمنل آفسنسز ایکٹ کے تحت قید کی سزا یا تین ہزار رنگٹ (2 لاکھ روپے پاکستانی روپے) تک جرمانہ یا دونوں میں سے کوئی بھی سزا دی جائے گی۔
ملائیشین اخبار بیریتا حریان کے مطابق ترنگگانو ریاستی ایگزیکٹو کونسل کے رکن محمد خلیل عبدالہادی نے ایک بیان میں کہا کہ صرف ایک بار بھی نماز جمعہ چھوڑ دینا بھی قابل سزا جرم تصور ہوگا۔
خیال رہے کہ اس سے پہلے صرف ان مردوں کو سزا دی جاتی تھی جو مسلسل 3 جمعہ کی نمازیں نہیں پڑھتے تھے مگر اب ایک نماز جمعہ چھوڑنے پر بھی سزا دی جائے گی۔
انہوں نے کہا کہ ریاستی حکومت مساجد پر بینرز لگائے گی تاکہ لوگوں کو جمعے کی نماز پڑھنے کی اہمیت یاد دلائی جا سکے، اور یہ مہم قانون کے بارے میں عوامی آگاہی بڑھانے کے لیے شروع کی گئی تھی۔
ان کا کہنا تھا کہ یہ یاددہانی اہم ہے کیونکہ جمعے کی نماز نہ صرف ایک مذہبی علامت ہے بلکہ مسلمانوں کے درمیان فرمانبرداری کا اظہار بھی ہے۔
محمد خلیل عبدالہادی نے مزید خبردار کیا کہ نماز چھوڑنے والے مردوں کے خلاف کارروائی عوامی رپورٹوں یا گشتوں کے ذریعے کی جاسکتی ہے۔
دوسری جانب، ریاست کی جانب سے اس اعلان کے بعد سوشل میڈیا پر شدید رد عمل سامنے آیا۔
وکیل عزیرا عزیز نے ایکس پر لکھا ’اسلام میں جبر نہ ہونے کا دعویٰ کہاں گیا، یا یہ اس بات کی عکاسی ہے کہ ترنگگانو کے کتنے کم مرد نماز جمعہ پڑھتے ہیں‘۔
انہوں نے مزید لکھا کہ اس سے کسی کو اختلاف نہیں کہ جمعہ کی نماز واجب ہے مگر اسے جرم کے طور پر قانون میں شامل کرنا ضروری نہیں تھا۔