ٹرانس جینڈر مخالف بیانات پر ماریہ بی 2 ستمبر کو این سی سی آئی اے میں طلب
معروف فیشن ڈیزائنر ماریا بی کو ان کے سوشل میڈیا پر ٹرانس جینڈر مخالف بیانات دینے کے الزام میں نیشنل سائبر کرائم انویسٹی گیشن ایجنسی (این سی سی آئی اے) کے سامنے 2 ستمبر کو پیش ہونے کے لیے طلب کیا گیا ہے۔
ماریا بی نے اپنی وکیل بیریسٹر خدیجہ صدیقی کو منگل کے روز نیشنل سائبر کرائم انویسٹی گیشن ایجنسی (این سی سی آئی اے) کے سامنے اپنے حق میں پیش ہونے کے لیے نامزد کیا، یہ مقدمہ ڈیزائنر کے سوشل میڈیا پر ٹرانس جینڈر مخالف بیانات سے متعلق ہے۔
وکیل نے کہا کہ انہوں نے اپنی کلائنٹ کے خلاف درج شکایت کی کاپی طلب کی ہے، لیکن ابھی تک انہیں فراہم نہیں کی گئی۔
این سی سی آئی اے نے انہیں منگل کے روز پیش ہونے کے لیے طلب کیا تھا، یہ کیس نعیم بٹ عرف سیما بٹ کی جانب سے ڈیزائنر پر سوشل میڈیا پر ٹرانس جینڈر کمیونٹی کی بدنامی کے الزام میں درج کیا گیا ہے۔
ماریا بی کی وکیل کے مطابق این سی سی آئی اے انہیں سوالات جاری کرے گی، جس کے بعد وہ اپنے جوابات جمع کروائیں گی اور انہیں 2 ستمبر کو دوبارہ طلب کیا گیا ہے۔
قبل ازیں ماریا بی نے کہا تھا کہ انہیں این سی سی آئی اے سے کوئی نوٹس موصول نہیں ہوا اور جب نوٹس موصول ہوگا تو وہ اپنی پوزیشن واضح کریں گی۔
جمعہ کو جاری ہونے والے نوٹس میں یہ ذکر نہیں تھا کہ ماریا بی کی کس پوسٹ کی طرف اشارہ کیا گیا ہے، تاہم اس ماہ کے شروع میں ڈیزائنر نے اپنے سوشل میڈیا اکاؤنٹس پر ویڈیوز پوسٹ کی تھیں، جس میں انہوں نے دعویٰ کیا تھا کہ لاہور میں ٹرانس جینڈر کمیونٹی کی جانب سے ایک نامناسب اور فحش ڈانس پارٹی منعقد کی گئی، جس میں ہم جنس پرستی کو فروغ دیا گیا۔
انہوں نے ان سرگرمیوں کو ملک کے اخلاقی اقدار کے خلاف قرار دیا تھا۔
لاہور پولیس نے پچھلے ہفتے تقریباً 60 ٹرانس جینڈر افراد اور دیگر کو مقدمے میں نامزد کیا اور کچھ کو گرفتار بھی کیا، کیونکہ ماریا بی نے پارٹی کی تصاویر اور ویڈیوز اپنے سوشل میڈیا اکاؤنٹس پر اپلوڈ کی تھیں، جس کے بعد یہ دعویٰ کیا گیا کہ یہ ایک ناپسندیدہ نجی پارٹی تھی۔
تاہم، بعد میں ایک مجسٹریٹ نے ٹرانس جینڈر افراد کے خلاف کیس خارج کر دیا، کیونکہ اس حوالے سے کوئی ثبوت نہیں ملا جو ملزمان کو مبینہ جرائم میں ملوث ثابت کرے۔
اتوار کو انسٹاگرام پر پوسٹ کی گئی ویڈیو میں ماریا بی نے کہا تھا کہ وہ پاکستان میں ایسی سرگرمیوں کو اجاگر کرنے اور ان کی حوصلہ شکنی کرنے کے اپنے عزم پر قائم رہیں گی۔
یہ پہلی بار نہیں ہے کہ ماریا بی نے اپنے سوشل میڈیا اکاؤنٹس پر ٹرانس جینڈر مخالف بیانات دیے ہیں، وہ ماضی میں بھی ٹرانس جینڈر کمیونٹی کے خلاف بیانات کی وجہ سے تنازعات کا حصہ رہ چکی ہیں۔