خود پسندی اور نمائش، کومل عزیز نے شوبز انڈسٹری چھوڑنے کی وجوہات بیان کردیں
اداکارہ، ماڈل و کاروباری شخصیت کومل عزیز نے شوبز انڈسٹری چھوڑنے کی وجوہات بیان کردیں۔
کومل عزیز خان نے حال ہی میں احمد علی بٹ کے پوڈکاسٹ میں شرکت کی، جہاں انہوں نے مختلف معاملات پر کھل کر گفتگو کی۔
اداکارہ نے شوبز انڈسٹری چھوڑنے کی وجوہات بتاتے ہوئے کہا کہ انہیں لگتا ہے کہ شوبز کا ماحول تعلیم یافتہ لوگوں کے لیے اچھا نہیں ہے، یہاں کام کے اوقات کار غیر انسانی ہیں اور انہیں ایسے لوگوں کے ساتھ کام کرنا پسند نہیں تھا جو کم تعلیم یافتہ ہوں۔
انہوں نے کہا کہ شوبز خواتین کے لیے محفوظ جگہ ہے لیکن یہاں آنے کے بعد انسان کی ذہنی صحت ضرور متاثر ہوتی ہے، سیٹ پر نچلے درجے کی سیاست ہوتی ہے جو انہیں پسند نہیں تھی۔
ان کے خیال میں اگر سیاست کرنی ہی ہے تو بڑی سطح کی کرنی چاہیے۔
کومل عزیز نے کہا کہ شوبز انڈسٹری ایک کمرشل دنیا ہے، یہاں بہت کم اداکار سچے اور اصلی ہوتے ہیں، زیادہ تر لوگ چکاچوند اور نمود و نمائش کے لیے آتے ہیں، یہ ایک رنگین دنیا ہے جو صرف خودپسند لوگوں کو اپنی طرف متوجہ کرتی ہے۔
ان کے مطابق یہاں ایک دوسرے کی تعریفوں کے پل باندھنے کا کلچر ہے اور لوگ اس تعریف اور خودپسندی کے عادی ہو جاتے ہیں، وہ ایسے ماحول کو برداشت نہیں کرسکتی تھیں۔
اداکارہ نے مزید کہا کہ انہوں نے اس انڈسٹری میں کام کرکے محض اپنے انسٹا فالوورز میں اضافہ کیا، تعلقات بنائے اور جب انہیں لگا کہ اب وہ کاروبار کرسکتی ہیں تو وہ خاموشی سے انڈسٹری سے الگ ہوگئیں۔
ان کے مطابق اس انڈسٹری میں کوئی کسی کا دوست نہیں ہوتا، دوستی صرف انسٹاگرام تک محدود ہوتی ہے۔