بھارت، شنگھائی تعاون تنظیم میں آذربائیجان کی مکمل رکنیت کی راہ میں حائل ہوگیا
بھارت، شنگھائی تعاون تنظیم (ایس سی او) میں آذربائیجان کی مکمل رکنیت کی راہ میں حائل ہوگیا تاہم چین نے آذربائیجان کی رکنیت کے لیے حمایت کی ہے۔
آذربائیجان کے میڈیا نے رپورٹ کیا کہ بھارت نے پاکستان کی غیر متزلزل حمایت اور دوستی کی وجہ سے ایک مرتبہ پھر آذربائیجان کو شنگھائی تعاون تنظیم کا مکمل رکن نہیں بننے دیا۔
میڈیا رپورٹس میں کہا گیا ہے کہ چین نے آذربائیجان کو ایس سی او کی رکنیت دینے کی حمایت کی ہے، تاہم بھارت نے آذربائیجان کی رکنیت کی درخواست کو بلاک کر دیا۔
رپورٹس کے مطابق آربائیجان کے صدر الہام علییوف نے وزیراعظم شہباز شریف سے چین کے شہر تیانجن میں ملاقات کے دوران یہ معاملہ بھی اٹھایا کہ پاکستان کا ساتھ دینے پر بھارتی حکومت، باکو سے عالمی تنظیموں میں انتقام لینے کی کوشش کررہی ہے۔
الہام علییوف نے کہا کہ وہ بھارت کے خلاف فتح پر پاکستان کو مبارکباد پیش کرتے ہیں۔
بھارت اس وقت آذربائیجان اور پاکستان کے برادرانہ تعلقات سے چڑ گیا ہے۔
شنگھائی تعاون تنظیم 2001 میں قائم کی گئی تھی جس کے ارکان میں پاکستان، بھارت، ایران، قازقستان، چین، کرغزستان، روس، تاجکستان اور ازبکستان شامل ہیں۔
بیلاروس بھی جولائی 2024 میں تنظیم کا رکن بن چکا ہے، ڈائیلاگ پارٹنرز میں کئی دیگر ممالک شامل ہیں۔