راوی میرے بیڈ روم تک آگیا ہے، سیلاب کے بعد سجاد علی کے گانے ’راوی‘ پر صارفین کے دلچسپ تبصرے
شدید بارشوں اور سیلابی صورتحال نے جہاں پنجاب کے کئی علاقوں کو متاثر کیا ہے، وہیں سوشل میڈیا صارفین نے اس کڑی حقیقت کو ہلکے پھلکے انداز میں بیان کرتے ہوئے گلوکار سجاد علی کے گانے ’راوی‘ کو موضوعِ گفتگو بنا لیا ہے۔
رواں سال ہونے والی شدید بارشوں اور بھارت کی جانب سے پانی چھوڑنے کے بعد پاکستان میں سیلابی صورتحال پیدا ہوچکی ہے، جس نے ملک کے سب سے بڑے صوبے پنجاب کو بری طرح متاثر کیا ہے، اب تک صوبے میں 20 لاکھ سے زائد افراد متاثر، جب کہ 33 افراد جاں بحق ہوچکے ہیں۔
پنجاب میں اس وقت بھی حالات تشویشناک ہیں کیونکہ دریائے چناب، راوی اور ستلج میں پانی کی سطح خطرناک حد تک بلند ہوچکی ہے، جس سے وسیع و عریض علاقے زیرِ آب آنے کے خدشات ہیں۔
گزشتہ دنوں دریائے راوی میں سیلاب آنے سے دریا کے کنارے آباد ہاؤسنگ سوسائٹیز میں پانی داخل ہوگیا، جن میں لاہور کی پارک ویو سوسائٹی بھی شامل ہے، جہاں متعدد گھر زیرِ آب آگئے، متاثرہ رہائشی سوشل میڈیا پر اپنے گھروں کی حالت کی ویڈیوز شیئر کر رہے ہیں۔
ایسے میں سوشل میڈیا صارفین نے حالات کو ہلکے پھلکے انداز میں بیان کرنے کے لیے معروف گلوکار سجاد علی کے 2019 میں ریلیز کیے گئے گانے ’راوی‘ کو موضوعِ گفتگو بنا لیا ہے۔
گانے کا مشہور بول ’راوی وچ پانی کوئی نہیں‘ سیلابی صورتحال کے تناظر میں تیزی سے وائرل ہورہا ہے۔
صارفین طنزیہ تبصرے کرتے ہوئے سوال کررہے ہیں کہ سجاد علی نے تو کہا تھا کہ راوی میں پانی نہیں، لیکن اب تو پانی گھروں اور بیڈ رومز تک پہنچ گیا ہے۔
کچھ صارفین کے مطابق یہ گانا 2025 میں زیادہ وائرل ہورہا ہے، جب کہ بعض نے مزاحیہ تبصرہ کیا کہ ’آ گیا راوی وچ پانی، اب سکون ہے‘۔
اسی دوران ایک پیروڈی گانا بھی وائرل ہوا ہے جس کے الفاظ ہیں ’راوی وچ پانی بہت ہے، تہ اڈے کل آنا موت ہے‘، جو صارفین کی توجہ کا مرکز بن گیا ہے۔