اسلام آباد: نیب نے ریلوے اراضی اسکینڈل کیس میں ملوث سابق جرنیلوں اور سویلین افسران کے خلاف تحقیقات مکمل کرلی ہیں۔
پیر کو ترجمان نیب کے مطابق، کیس میں ملوث تین جرنیلوں اور دو سویلین افسران کے بیانات ریکارڈ کرلیے ہیں جن میں لیفٹیننٹ جنرل ریٹائرڈ جاوید اشرف قاضی، لیفٹیننٹ جنرل ریٹائرڈ سعیدالظفر اور میجر جنرل ریٹائرڈ حامد حسن جبکہ سویلین افسران سابق رکن فنانس ریلوے خورشید احمد خان اور جی ایم آپریشن اقبال صمد خان شامل ہیں۔
انہوں نے کہا کہ تحقیقاتی رپورٹ رواں ہفتے نیب ایگزیکٹیو بورڈ کے اجلاس میں پیش کی جائے گی۔
ترجمان کا مزید کہنا ہے کہ کارکے رینٹل پاور کو ہرجانے کا نوٹس تاحال نہیں دیا گیا تاہم نوٹس کا آئینی اور قانونی پہلو سے جائزہ لیا جا رہا ہے۔
