آکلینڈ۔: انگلینڈ کی ٹیم آکلینڈ ٹیسٹ کے تیسرے روز اپنی پہلی اننگز میں 239 رنز کے خسارے کے ساتھ 204 رنز بنا کر آؤٹ ہو گئی۔
کھیل کے اختتام تک نیوزی لینڈ نے تین وکٹوں پر 35 رنز بنا لئے تھے اور اسے 274 رنز کی برتری حاصل ہوگئی ہے۔
اتوار کو یہاں ایڈن پارک، آکلینڈ میں مہمان ٹیم نے اپنی پہلی نامکمل اننگز 50 رنز دو کھلاڑی آؤٹ پر دوبارہ شروع کی تو نک کمپٹن 12 اور ایان بیل 6 رنز پر کھیل رہے تھے۔
کمپٹن گزشتہ روز کے سکور میں صرف ایک رن کا اضافہ کرنے کے بعد ٹم ساؤتھی کا شکار بن گئے۔
ایان بیل دوسرے آؤٹ ہونے والے کھلاڑی تھے جو 17 رنز بنانے کے بعد ٹم ساؤتھی کی گیند پر ایل بی ڈبلیو ہو گئے۔
بہتر کے مجموعی سکور پر انگلینڈ کی پانچویں وکٹ گر گئی جب جونی بیئرسٹو 3 رنز بنا کر ٹرینٹ بولٹ کی گیند پر ایل بی ڈبلیو ہوئے۔
اس موقع پر جو روٹ اور میٹ پرائر نے ذمہ داری سے بیٹنگ کی اور 101 رنز کی شراکت قائم کرکے ٹیم کا سکور 173 تک پہنچا دیا۔
میٹ پرائر 73 رنز بناکر نیل وینگر کا نشانہ بنے۔ سٹورٹ براڈ 16 ، سٹیون فن صفر، جیمز اینڈرسن 4 اور جو روٹ 45 رنز بنانے کے بعد آؤٹ ہوئے۔
اس طرح انگلینڈ کی پوری ٹیم 204 رنز بنا کر پویلین واپس لوٹ گئی اور اسے 239 رنز کے خسارے کا سامنا کرنا پڑا۔
نیوزی لینڈ کی جانب سے ٹرینٹ بولٹ سب سے کامیاب باؤلر رہے انہوں نے 6 کھلاڑیوں کو آؤٹ کیا۔ ٹم ساؤتھی نے 3 اور نیل وینگر نے ایک وکٹ حاصل کی۔
نیوزی لینڈ نے تیسرے روز کھیل کے اختتام تک 3 وکٹوں کے نقصان پر 35 رنز بنا لئے اور اسے 274 رنز کی برتری حاصل ہوگئی ہے۔
ہمیش ردرفورڈ صفر، کیم ولیمسن ایک اور روس ٹیلر 3 رنز بنانے کے بعد پویلین واپس لوٹ گئے۔ پیٹرفلٹن 14 اور ڈین براؤنلی 13 رنز کے ساتھ وکٹ پر موجود ہیں۔
سٹورٹ براڈ نے دو اور جیمز اینڈرس نے ایک وکٹ حاصل کی۔
