راولپنڈی : جی ایچ کیو حملہ کیس میں پھانسی کی سزا پانے والے عقیل عرف ڈاکٹر عثمان کو سزائے موت دینے کی تیاریاں مکمل کرلی گئی ہیں۔

ڈان نیوز کے مطابق ذرائع کا کہنا ہے کہ آرمی چیف نے ڈاکٹر عثمان کے ڈیتھ وارنٹ پر گزشتہ رات دستخط کردیے تھے۔

ڈاکٹر عثمان کے ڈیتھ وارنٹ پر دستخط ہونے کے بعد ان کو جیل کے ڈیتھ سیل میں منتقل کر دیا گیا تھا۔

عقیل عرف ڈاکٹر عثمان سے لواحقین کی آخری ملاقات کروا دی گئی ہے۔

ڈاکٹر عثمان نے اپنی وصیت بھی بھائی کے سپرد کردی ہے۔

جیل کے اطراف میں انتہائی سخت سیکورٹی انتظامات کیے گئے ہیں۔

ذرائع کا کہنا ہے کہ ڈاکٹر عثمان کو آئندہ 24 سے 48 گھنٹوں میں پھانسی کی سزا دی جا سکتی ہے۔

پھانسی کے بعد ڈاکٹر عثمان کی میت ان کے بھائی وصول کریں گے۔

یاد رہے کہ ڈاکٹر عثمان پاک فوج میں میڈیکل کور کے اہلکار تھے انہوں نے آرمی چھوڑ کر عسکریت پسندوں میں شمولیت اختیار کر لی تھی۔

ڈاکٹر عثمان پر الزام ہے کہ انہوں نے 10 اکتوبر 2009 کو جی ایچ کیو (جنرل ہیڈ کوارٹرز) پر حملہ کرنے کی منصوبہ بندی اور قیادت کی تھی۔

اس حملے میں 10 عسکریت پسندوں نے بھاری ہتھیاروں کے ذریعے حملہ کیا تھا جس سے 11 فوجی اہلکار مارے گئے تھے۔

واضح رہے کہ ملک بھر کی جیلوں میں دہشت گردی کے مقدمات میں سزائے موت پانے والے دیگر مجرموں کو بھی پھانسی دینے کی تیاریاں مکمل کر لی گئی ہیں۔

ملک بھر میں حملوں کے خطرے کے باعث جیلوں کی سیکورٹی انتہائی سخت کردی گئی۔