لاہور: پنجاب کے سابق گورنر چوہدری محمد سرور نے کہا ہے کہ وہ کسی لندن پلان کا حصہ نہیں اور اگر یہ الزام ان پر ثابت ہو جائے تو وہ ہر سزا بھگتنے کے لیے تیار ہیں۔

لندن روانگی سے قبل لاہور میں میڈیا سے گفتگو کرتے ہوئے ان کا کہنا تھا کہ آج سے ان کا حکمران مسلم لیگ نواز سے کوئی تعلق نہیں ہے۔

چوہدری محمد سروسر نے چند روز قبل اپنے عہدے سے استعفیٰ دے دیا تھا جس کے بعد ان کا کہنا تھا کہ ملک میں قبضہ مافیا کے لوگ ایک گورنر سے زیادہ طاقتور نہیں۔

انہوں نے حکومت کو مشورہ دیا کہ حکومت قبضہ مافیا کے مسئلے کو فوری حل کرے۔

مزید پڑھیں: گورنر پنجاب کا استعفیٰ منظور

سابق گورنر نے مزید کہا کہ پاکستان میں 95 فیصد لوگ 5 فیصد کے شکنجے میں جکڑے ہوئے ہیں اور اس کیلئے صرف سیاستدانوں پر الزام لگانا ٹھیک نہیں ہے۔

چوہدری سرور نے گورنر کے عہدے کے لیے پاکستان واپسی کے وقت برطانیہ کی شہریت بھی ترک کر دی تھی۔

ایک سوال پر انہوں نے کہا کہ وہ اب دوبارہ برطانوی شہریت کے لیے کوشش نہیں کریں گے اور اب ان کا جینا مرنا پاکستان کیلئے ہے۔

انہوں نے کہا کہ پاکستان کے لئے ان سے جو کچھ بھی ہو سکا وہ کریں گے۔

انھوں نے پاکستانی عوام کو بہادر قرار دیتے ہوئے کہا کہ ’مشکل کی ہر گھڑی میں قوم ثابت قدم رہی ہے‘۔

یہ بھی پڑھیں: گورنر پنجاب کا شریف برادران سے اختلافات کی تردید

پاکستانی سیاست میں آنے کے حوالے سے ان کا کہنا تھا کہ وہ ’سیاست میں آنے کا فیصلہ دوستوں کی مشاورت سے کریں گے‘۔

پنجاب کے سابق گورنر نے پاکستانی تعلیمی نظام میں موجود خرابیوں کے حوالے سے حکومت کو تنقید کا نشانہ بناتے ہوئے کہا کہ ملک کے 2 کروڑ 30 لاکھ بچوں کا سکول نہ جانا حکومتی نااہلی کا منہ بولتا ثبوت ہے۔