بولی وڈ کو 'میں ہوں ناں' اور 'ہیپی نیو ایئر' جیسی بلاک بسٹر فلمیں دینے والی فرح خان نے انڈسٹری کے خانوں ( شاہ رخ، سلمان اور عامر) کو ایک ساتھ فلم میں کاسٹ کرنا ایک مشکل کام قرار دے دیا۔

کوریو گرافر سے فلمسازی کی طرف سفر کرنے والی 50 سالہ فرح خان نے اب میزبانی کے شعبے میں بھی قدم رکھ دیا ہے اور 'فرح کی دعوت' کے نام سے ان کا ایک شو ہندوستان میں مقبول ہے۔

فرح خان سے اکثر یہ فرمائش کی جاتی ہے کہ بولی وڈ کے خانوں (شاہ رخ ، سلمان اور عامر) کو ایک ساتھ کسی فلم میں کاسٹ کیا جائے۔

تاہم فرح نے اس کام کو نہایت مشکل قرار دیتے ہوئے کہا ہے کہ اگرچہ وہ شاہ رخ، سلمان اورعامرکی بہت اچھی دوست ہیں، تاہم وہ انھیں ایک ساتھ کسی فلم میں کاسٹ کرنے کا وعدہ نہیں کرسکتیں۔

فرح کے مطابق 'خدا بھی انھیں (شاہ رخ، سلمان اورعامر کو) اکٹھا نہیں کرسکتا، لہذا میں بھی اس کی حامی نہیں بھر سکتی'۔

ان کا مزید کہنا تھا کہ انھوں نے 8 سال پہلے تنیوں خانز کو فلم 'اوم شانتی اوم' کے ایک گانے کے لیے اکٹھا کرنے کی کوشش کی تھی، تاہم وہ بھی ممکن نہ ہوسکا۔

اور یہ حقیقت ہے کہ شاہ رخ اور دیپیکا پڈوکون کے ایک گانے میں بولی وڈ کی 30 سلیبرٹیز نے حصہ لیا، جن میں اگرچہ سلمان خان بھی شامل تھے، تاہم عامر خان اس موقع پر بھی دستیاب نہ ہوسکے۔

مزید پڑھیں:بولی وڈ خانوں کی فلموں کے بائیکاٹ کا مطالبہ

تاہم فرح نے ہمت نہیں ہاری اور اس امید کا اظہار کیا ہے کہ اگر وہ شاہ رخ خان، سلمان خان اور عامر خان کو ایک ساتھ کسی فلم میں کاسٹ کرنے میں کامیاب ہوگئیں تو یہ زبردست ہوگا۔

ان کا کہنا تھا کہ 'اگرچہ امکانات کم ہیں لیکن کسی نہ کسی دن میں خوش نصیب کہلاؤں گی، لہذا کبھی بھی 'نہیں' نہیں کہنا چاہیے'۔

بشکریہ: ہندوستان ٹائمز