راولپنڈی: کرنسی اسمگلنگ کیس میں گرفتار سپر ماڈل ایان علی کی رہائی کے روبکار پر دستخط ہونے کے بعد انھیں آج اڈیالہ جیل سے رہا کردیا گیا۔

رواں ہفتے 14 جولائی کو لاہور ہائیکورٹ نے ماڈل ایان علی کو ضمانت پر رہا کرنے کا حکم جاری کیا تھا۔

ایان علی کو میڈیا سے دور رکھنے کے لیے جیل کے رہائشی علاقے کے گیٹ سے باہر نکالا گیا۔

ان کے ہمراہ ایک وکیل اور ان کا چھوٹا بھائی گاڑی میں موجود تھے۔

مزید پڑھیں:ایان علی کی رہائی کا حکم جاری

جمعرات کو ایان علی کے ضامن عدالت میں پیش ہوئے، ضامنوں میں محمد نواز، شوکت بھٹی،محمد عمران اور طارق محمود شامل تھے۔

ایان علی کی قانونی ٹیم بھی ان کے وکیل خرم لطیف کھوسہ کی سربراہی میں عدالت میں پیش ہوئی اور 5، 5 لاکھ روپے کے 2 ضمانتی مچلکے ڈیوٹی مجسٹریٹ صابر سلطان کو جمع کرائے۔

ڈیوٹی جج صابر سلطان نے ضمانتی مچلکوں کی جانچ پڑتال کے بعد ماڈل ایان علی کی رہائی کے روبکار پر دستخط کردیئے، جس کے بعد ماڈل کو اڈیالہ جیل سے رہا کردیا گیا۔

ایان علی کو گذشتہ روز ہی رہا کیا جانا تھا تاہم بعض قانونی پیچیدگیوں کے باعث ان کی رہائی کے احکامات پر دستخط نہ کیے جاسکے۔

سپر ماڈل ایان علی کو رواں برس 14 مارچ کو اسلام آباد کے بینظیر انٹرنیشنل ایئرپورٹ سے دبئی جاتے ہوئے اُس وقت حراست میں لیا گیا تھا جب دورانِ چیکنگ ان کے سامان میں سے 5 لاکھ امریکی ڈالر برآمد ہوئے تھے۔

اس سے قبل ایان کی درخواست ضمانت راولپنڈی کی کسٹم عدالت اور لاہور ہائی کورٹ کی جانب سے مسترد کردی گئی تھیں، جس کے بعد ماڈل کی جانب سے لاہور ہائیکورٹ میں ایک اور درخواست جمع کرائی گئی۔

چیف جسٹس لاہور ہائیکورٹ نے ماڈل کی درخواست ضمانت کی سماعت کے لیے دو رکنی بینچ تشکیل دیا تھا، جس نے گزشتہ روز ایان علی کی رہائی کا حکم جاری کیا۔