پی سی بی کی جانب سے خالد،شرجیل کو چارج شیٹ جاری
پاکستان کرکٹ بورڈ (پی سی بی) نے پی ایس ایل فکسنگ اسکینڈل میں ملوث شرجیل خان اور خالدلطیف کو چارج شیٹ جاری کردی ہے۔
پی سی بی کے میڈیا ڈائریکٹر امجد حسین نے میڈیا سے گفتگو کرتے ہوئے کہا کہ 'شرجیل خان اور خالد لطیف کےبیانات سننے کےبعد چارج شیٹ دونوں کھلاڑیوں کو جاری کر کے وصولی کے دستخط بھی لیے گئے'۔
ان کا کہنا تھا کہ 'دونوں کھلاڑی 14 روز کے اندر پی سی بی کے اینٹی کرپشن یونٹ کو جواب دینے کے پابند ہیں جس کے بعد فیصلہ کیا جائے گا'۔
امجد حسین نے کہا کہ 'کھلاڑیوں کی جانب سے الزامات کو مسترد کرنے پر سابق جج کی سربراہی میں ایک کمیٹی تشکیل دی جائے گی جو سماعت کے بعد فیصلہ سنائے گی'۔
انھوں نے کہا کہ 'اگر کھلاڑیوں نے جرم تسلیم کرلیا تو پی سی بی اینٹی کرپشن کے ٹریبونل دونوں کھلاڑیوں کی قانون کے مطابق سزاؤں کا تعین کرے گا'۔
مزید پڑھیے: پی ایس ایل حکام کے منہ پر طمانچہ
خیال رہے کہ خالد لطیف اور شرجیل خان کو انسداد کرپشن کے قواعد کی خلاف ورزی پر پی ایس ایل حکام نے لیگ کے دوسرے سیزن کے پہلے میچ کے بعد ہی پاکستان واپس بھیج دیا تھا جبکہ محمد عرفان سمیت چند دیگر کھلاڑیوں سے بھی تفتیش کی گئی تھی۔
پی ایس ایل کے دوسرے سیزن کے مقابلے دبئی کے بعد اب شارجہ میں کھیلے جارہے ہیں۔
لائیو ٹی وی