کوئٹہ: پاکستان کے جنوب مغربی صوبے بلوچستان کے دارالحکومت کوئٹہ میں نامعلوم افراد کی فائرنگ سے دو افراد ہلاک ہوگئے۔

کوئٹہ پولیس کے سپرنٹنڈنٹ عمران قریشی نے ڈان ڈاٹ کام کو بتایا کہ یہ واقعہ کوئٹہ کے علاقے اسپنی روڈ پر پیش آیا جہاں مسلح افراد کی فائرنگ سے دو افراد ہلاک ہوگئے۔

انہوں نے بتایا کہ ہلاک ہونے والے دونوں افراد کا تعلق ہزارہ برداری سے تھا جو ہزارہ ٹاؤن سے شہر کی جانب آرہے تھے۔

عمران قریشی کا کہنا تھا کہ واقعہ کے بعد پولیس اور ایف سی کی بھاری نفری علاقے میں پہنچ گئی اور واقعہ کی تفتیش شروع کردی۔

بعد میں ہلاک ہونے والے افراد کی لاشوں کو ہسپتال منتقل کردیا گیا۔

ایک اور پولیس افسر نے اپنا نام ظاہر نہ کرنے کی شرط پر ڈان کو بتایا کہ بظاہر یہ واقعہ فرقہ وارانہ ٹارگیٹ کلنگ لگتا ہے۔

فوری طور پر ابھی کسی بھی گروپ یا تنظیم نے اس واقعہ کی ذمہ داری قبول نہیں کی ہے۔

واضح رہے کہ اسپنی روڈ کوئٹہ شہر کا ایک حساس علاقہ ہے اور پولیس کی چیک پوسٹ ہونے کے باوجود بھی اس قسم کے واقعات میں کمی نہیں آسکی ہے۔