کابل : افغانستان کے مغربی صوبہ ہرات میں ایک حملے میں چھ افغان پولیس اہلکار ہلاک ہو گئے۔

امریکی خبر رساں ادارے ایسوسی ایٹڈ پریس کے مطابق صوبائی پولیس چیف کے ترجمان رؤف احمدی کا کہنا ہے کہ یہ حملہ طالبان جنگجوؤں کی جانب سے کیا گیا جس میں چھ پولیس اہلکار ہلاک اور چھ ہی زخمی بھی ہوئے۔

ترجمان کا کہنا تھا کہ پولیس کی جوابی کارروائی میں آٹھ طالبان بھی ہلاک ہوئے۔

افغان وزارت داخلہ کے مطابق گزشتہ چھ ماہ کے دوران افغان طالبان کے حملوں میں 1500سے زائد پولیس اہلکار ہلاک ہو چکے ہیں۔

امریکی اور نیٹو فورسز کے انخلاء کے ساتھ ہی افغان سیکیورٹی فورسز نے اس سال طالبان کے خلاف اپنی کارروائیوں کا دائرہ کار بڑھا دیا ہے، جس کے نتیجے میں ہلاکتوں میں اضافہ ہو گیا ہے۔

امریکی اور نیٹو افواج رواں سال افغانستان سے اپنا انخلاء مکمل کرلیں گی۔