انڈین ٹیم کی شرٹ پہننے پر فیڈرر کی معافی
دبئی: ٹینس اسٹار راجر فیڈرر نے روایتی حریفوں پاکستان اور ہندوستان کے میچ میں ہندوستانی ٹیم کی شرٹ پہننے اور ان کی حمایت کی تشہیر کرنے پر اپنے شائقین سے معافی مانگی ہے۔
17 مرتبہ گرینڈ سلیم ٹائٹل جیتنے والے فیڈرر اور ہندوستانی ٹیم کا اسپانسر ایک ہے اور گزشتہ ہفتے ایڈیلیڈ میں روایتی حریفوں کے رمیان میچ سے قبل فیڈرر نے فیس بک پیج پر ہندوستانی ٹیم کی شرٹ تھامے ایک تصویر لگائی تھی۔
غیر ملکی خبر رساں ایجنسی اے ایف پی کے مطابق سوئٹزرلینڈ کے اسٹار نے دبئی اوپن ٹینس کے آغاز سے قبل کہا کہ یہ سب دراصل اسپانسر نائکی کے لیے تھا۔
انہوں نے کہا کہ یہ سب نائکی کی مہم کا حصہ تھا کیونکہ میں نے کچھ ہندوستانی کھلاڑیوں سے ملاقات کی تھی اور کچھ وقت ہندوستان میں گزارا تھا تو اسی دوران انہوں نے مجھے یہ شرٹ دی تھی۔
فیڈرر نے کہا کہ میں جنوبی افریقہ کا حامی ہوں اور سب یہ بات جانتے ہیں، اس مہم کا مقصد ہرگز کسی کے جذبات بھڑکانا نہیں تھا اور اگر ایسا ہوا ہے تو میں اس پر معذرت خواہ ہوں۔
اس تصویر پر پاکستان میں موجود فیڈر کے فینز کو شدید صدمہ پہنچا تھا۔
انگلینڈ میں کیمبرج یونیورسٹی کے طالبعلم نے پاکستان کے مقامی اخبار میں تحریر لکھتے ہوئے دعویٰ کیا تھا کہ انہوں نے فیڈرر کی تمام تصاویر ختم کر دی ہیں اور لوگوں کی آرا بھی لیں جس میں سے 12 میں سے دس طلبا نے کہا کہ فیڈرر کے اس رویے سے انہیں شدید دلی صدمہ پہنچا۔
واضھ رہے کہ فیڈرر جنوبی افریقہ کے بڑے حامی ہیں کیونکہ ان کی والدہ کا تعلق اسی ملک سے ہے اور راجر فیڈرر فاؤنڈیشن نے اس ملک کے متاثرہ بچوں کی مدد کے لیے بڑے پیمانے پر فنڈ بھی اکٹھا کیا تھا۔