اسلام آباد: صدر بیلاروس الیگزینڈر لوکاشینکو دو روزہ دورہ پاکستان پر جمعرات کے روز اسلام آباد پہنچے جہاں نور خان ایئربیس پر ان کا استقبال وزیراعظم نواز شریف نے کیا۔

بیلاروس کے صدر الیگزینڈر لوکاشینکو صدر مملکت ممنون حسین کی دعوت پر پاکستان کے سرکاری دورے پر آئے ہیں۔

ریڈیو پاکستان کی رپورٹ کے مطابق یہ کسی بھی بیلاروس کے صدر کا پہلا دورہ پاکستان ہے۔ ان کا استقبال 21 توپوں کی سلامی سے کیا گیا۔

صدر لوکاشینکو دورے کے دوران ممنون حسین اور نواز شریف کے علاوہ دیگر اہم شخصیات سے ملاقاتیں کریں گے جبکہ دورے کے دوران متعدد اہم معاہدوں اور یادداشتوں پر دستخط ہونے کی امید ہے۔

بیلاروس نے نومبر 2014 میں اپنا رہائشی مشن اسلام آباد میں قائم کیا تھا۔

بیلاروس کے صدر کے دورے کو دونوں ممالک کے درمیان تعلقات کو مزید مضبوط بنانے کے حوالے سے ایک قدم کے طور پر دیکھا جارہا ہے۔