شارجہ ون ڈے مشکوک نہیں، آئی سی سی
دبئی: انٹرنیشنل کرکٹ کونسل کے چیف ایگزیکٹیو ڈیوڈ رچرڈسن نے کہا ہے کہ انہیں پاکستان اور انگلینڈ کے درمیان شارجہ میں کھیلے گئے ون ڈے میچ پر ’زیادہ شک نہیں‘۔
برطانوی روزنامہ ڈیلی میل نے الزام لگایا تھا کہ آئی سی سی کا انسداد کرپشن یونٹ منگل کو کھیلے گئے میچ پر سٹے کے غیر معمولی پیٹرن کی وجہ سے تحقیقات کر رہا ہے۔
روزنامہ نے دعوی کیا کہ میچ سے قبل یونٹ کو اطلاع ملی تھی کہ پاکستان خراب کھیلے گا اور تین میزبان بلے بازوں کے رن آؤٹ اور خراب فیلڈنگ مشکوک ہے۔
اس میچ میں پاکستان ایک بے جان پچ پر محض 208 رنز بنا سکا تھا جبکہ اس کے تین بلے باز کپتان اظہر علی، محمد رضوان اور شعیب ملک رن آؤٹ ہوئے۔
تاہم ، آئی سی سی چیف رچرڈسن کہتے ہیں کہ اس طرح کے رن آؤٹ کرکٹ میں ہوتے رہتے ہیں۔
’یقیناً کبھی کبھار ایسا ہو جاتا ہے، کچھ عجیب و غریب رن آؤٹ بھی ہوتے ہیں اور میں خود اتنی بار رن آؤٹ ہوا کہ مجھے اب صحیح تعداد بھی یاد نہیں‘۔
رچرڈ سن نے بی بی سی ریڈیو کے پروگرام ’ٹیسٹ میچ سپیشل‘ سے گفتگو میں مشکوک پیشکش ملنے پر پاکستانی پلیئرز کی جانب سے فوراً رپورٹ کیے جانے کو سراہا۔
’حتی کہ پاکستانی کھلاڑی خود ان دنوں کوئی بھی مشکوک پیشکش ملنے پر فوراً رپورٹ کرتے ہیں جس کی وجہ سے مجھے کوئی زیادہ تشویش نہیں‘۔
رچرڈسن نے کرپشن کے خلاف لڑائی میں پیش رفت پر اطمینان ظاہر کیا۔ پاکستان کے ہیڈ کوچ وقار یونس نے بھی شارجہ ون میں فکسنگ کے الزامات مسترد کر دیے تھے۔