شاہد آفریدی کا انگلش کاؤنٹی ہمپشائر سے معاہدہ
لندن: پاکستان ٹی ٹوئنٹی کرکٹ ٹیم کے کپتان شاہد خان آفریدی نے ورلڈ ٹی ٹوئنٹی کے بعد کرکٹ سے کنارہ کشی کے فیصلے کا ازسرنو جائزہ لینے کے اعلان کے بعد انگلش کرکٹ کاؤنٹی ہمپشائر سے نیٹ ویسٹ ٹی ٹوئنٹی بلاسٹ کے پورے سیزن کے لیے معاہدہ کرلیا۔
شاہد آفریدی نے اس سے قبل 2011 میں کلب کی نمائندگی کی تھی جہاں ٹیم ٹورنامنٹ کے سیمی فائنل تک رسائی میں کامیاب ہوئی تھی اور آفریدی نے سمرسیٹ کے خلاف 42 گیندوں پر 80 رنز کی یادگار اننگز کھیلی تھی۔
آفریدی کلب میں جنوبی افریقی آل راؤنڈر ریان مک لیرن کے ساتھ غیر ملکی کھلاڑی کے طور پر شامل ہوں گے۔
کرکٹ ویب سائٹ کرک انفو کی رپورٹ کے مطابق آفریدی رواں سال مئی میں ہمپشائر پہنچ جائیں گے جس کے لیے انھوں نے کیریبئین پریمیئر لیگ سےمعاہدہ کرنے سے انکار کیا تھا جبکہ اس دوران انھیں بین الاقوامی طور پر کسی مقابلے کے لیے قومی ٹیم کی نمائندگی بھی نہیں کرنی ہے۔
ہمپشائر کے ڈائریکٹر کرکٹ جائلز کلارک کا کہنا تھا کہ اس سال ایک مخصوص عرصے کے لیے کھلاڑیوں کا حصول ایک چیلنج تھا اس لیے ہم خوش ہیں کہ آفریدی پورے ٹورنامنٹ کے لیے ہمیں دستیاب ہیں۔
ان کا کہنا تھا کہ ’آفریدی نے گزشتہ دفعہ ہماری نمائندگی کی تھی اور اپنی کارکردگی کے ذریعے گہرے اثرات مرتب کئے تھے اور ان کی واپسی ٹی ٹوئنٹی ٹورنامنٹ کے لیے بڑی حوصلہ افزا ہے‘۔
شاہد آفریدی نے اس سے قبل ایک انٹرویو می کہا کہ تھا کہ میرے اہلخانہ، دوستوں سمیت بڑوں کا مجھ پر بہت زیادہ دباؤ ہے اور ان کا کہنا ہے کہ مجھے ٹی ٹوئنٹی سے ریٹائر ہونے کی بالکل ضرورت نہیں.
واضح رہے آفریدی نے گزشتہ سال کرکٹ ورلڈ کپ 2015 کے بعد ون ڈے کرکٹ سے کنارہ کشی اختیار کرتے ہوئے ورلڈ ٹی ٹوئنٹی کے بعد ٹی ٹوئنٹی کرکٹ سے بھی ریٹائرمنٹ کا اعلان کیا تھا.
ٹورنامنٹ میں کرس گیل اور برینڈن مک کولم جیسے بڑے کھلاڑیوں کی شرکت یقنی ہے لیکن ٹورنامنٹ کی طوالت کے باعث جو پورے سیزن میں زیادہ تر جمعے کی رات کو مئی کے وسط سے جولائی کے اواخر تک منعقد ہوگا اور ناک آؤٹ مرحلے اگست میں کھیلا جائے گا جس کا مطلب یہ ہے کہ کھلاڑی اس عرصے میں یہاں ٹھہر نہیں سکتے۔
انگلش کاؤنٹی کے ٹی ٹوئنٹی بلاسٹ کے موجودہ طرز کی 2017 میں تبدیلی متوقع ہے جہاں ریجنل کے مقابلے میں دو ڈویژن پر مشتمل ٹورنامنٹ کو ترجیح دی جائے گی.
آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔