کراچی: پاک فوج کے ایک سابق افسر جمعرات کے روز کنٹونمنٹ کے قریب ایک ہوٹل میں مردہ حالت میں پائے گئے۔

آرٹلری میدان تھانے کے ایس ایچ او عبدالغفار کے مطابق 55 سالہ ریٹائرڈ میجر عمران جاوید مہران ہوٹل میں اپنے کمرے میں مردہ حالت میں پائے گئے۔

وہ لاہور سے کراچی آئے تھے اور ہوٹل میں 9:30 بجے پہنچے تھے۔ ان کے سر پر گولی کی وجہ سے زخم کا نشان پایا گیا۔

پولیس افسر کے مطابق انہیں واقعے کے بارے میں دوپہر تین بجے آگاہ کیا گیا۔

ان کے کمرے سے ایک ٹی ٹی پستول برآمد ہوئی ہے۔

ایس ایچ او کے مطابق بظاہر یہ واقعہ خودکشی کا نظر آتا ہے تاہم تحقیقات جاری ہیں جبکہ فوجی افسر نے خودکشی سے قبل کوئی نوٹ نہیں چھوڑا۔

لاش کو جناح ہسپتال منتقل کیا گیا جہاں پولیس سرجن ڈاکٹر خلیل شیخ نے اسے خودکشی کا واقعہ قرار دیا۔

ایس ایچ او کا مزید کہنا تھا کہ لاہور میں ریٹائرڈ میجر کے اہل خانہ کو آگاہ کردیا گیا ہے۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔