قومی اسمبلی: آئین میں 22 ویں ترمیم کا بل منظور
اسلام آباد: قومی اسمبلی میں آئین میں 22 ویں ترمیم کا بل متفقہ طور پر منظور کر لیا گیا۔
قومی اسمبلی میں 22 ویں آئینی ترمیم کا بل وزیر قانون زاہد حامد نے پیش کیا۔
رائے شماری کے دوران 236 ارکان نے 22 ویں آئینی ترمیم کی منظوری کے حق میں ووٹ دیا جبکہ ایوان میں موجود کسی بھی رکن نے مخالفت میں ووٹ نہیں ڈالا۔
ترمیم کے تحت چیف الیکشن کمشنر اور ارکان الیکشن کمیشن کے تقرر کے طریقہ کار تبدیل کیا گیا، جبکہ چیف الیکشن کمشنر کے لیے سپریم کورٹ کا ریٹائرڈ جج ہونے کی شرط ختم کر دی گئی۔
خیال رہے کہ 22 ویں ترمیمی بل میں آئین کے 8 آرٹیکلز میں ترمیم کی تجویز دی گئی ہے، قومی اسمبلی سے بل کی منظوری کے بعد اب سینیٹ میں اس پر ووٹنگ ہو گی، وہاں سے منظور ہونے پر صدر مملکت کے دستخط کے ساتھ یہ ترمیم باقاعدہ آئین کا حصہ بن جائے گی۔
ڈان نیوز نے رپورٹ کیا کہ ترمیمی بل کے مطابق سپریم کورٹ کے حاضر سروس یا ریٹائرڈ جج کے علاوہ اب کم سے کم 20 سالہ تجربہ کا حامل سرکاری افسر یا ٹیکنوکریٹ بھی چیف الیکشن کمشنر مقرر ہو سکے گا۔
اس طرح الیکشن کمیشن کے ارکان کے لیے صرف ہائی کورٹ کے حاضر سروس یا ریٹائرڈ جج کی شرط ختم کردی گئی ہے اور کمیشن کا رکن کوئی بھی سینئر سرکاری افسر یا ٹیکنو کریٹ مقرر کیا جا سکے گا۔
چیف الیکشن کمشنر کی غیرموجودگی میں سینئر ترین جج کو قائم مقام بنانے کی شرط ختم کردی گئی اور الیکشن کمیشن کا سینئر ترین رکن قائم مقام چیف الیکشن کمشنر کے فرائض انجام دے سکے گا۔
ترمیم کے تحت اب الیکشن کمیشن کے 2 ارکان 5 سال جبکہ 2 ارکان ڈھائی سال کے لیے منتخب ہوں گے۔
آئین میں 22 ویں ترمیم کے بل میں چیف الیکشن کمشنر کی عمر کی حد 68 برس اور رکن کی عمر65 سال مقرر کی گئی۔
ترامیم کی منظوری کے بعد وفاقی وزیر قانون زاہد حامد نے پورے ایوان کو مبارک باد دی۔
ان کا کہنا تھا کہ انتخابی اصلاحات کمیٹی کے 18 اجلاس ہوچکے ہیں اور جب ترامیم کے حوالے سے سفارشات طلب کی گئی تھیں تو 1200 سے زائد تجاویز موصول ہوئی تھیں۔
وفاقی وزیر نے کہا کہ 1200 سفارشات 4000 صفحات پر تحریر تھیں، ان تمام سفارشات اور تجاویز کا جائزہ لیا گیا۔
انہوں نے بتایا کہ پارلیمانی پارٹیوں کے نمائندوں پر مشتمل کمیٹی نے متفقہ طور پر سفارشات منظور کیں جس کی وجہ سے قومی اسمبلی میں متفقہ طور پر 22 ویں آئینی ترمیم کا بل منظور ہو سکا۔
آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔