اکاؤنٹس کی تفصیلات جمع کرانے کیلئے سیاسی جماعتوں کو نوٹس
اسلام آباد: الیکشن کمیشن آف پاکستان(ای سی پی) نے خبردار کیا ہے کہ اکائونٹس کی تفصیلات جمع نہ کرانے والی سیاسی جماعتیں انتخاب میں حصہ لینے کی اہل نہیں ہوں گی۔
سیاسی جماعتوں کو بھیجے جانے والے نوٹس میں الیکشن کمیشن نے یاد دہانی کرائی ہے کہ پولیٹیکل پارٹیز آرڈر 2002 کے سیکشن 13 کے تحت تمام سیاسی جماعتیں اس بات کی پابند ہیں کہ وہ مالی سال ختم ہونے کے 60 روز کے اندر الیکشن کمیشن کو اپنے اکائونٹس کی تفصیلات جمع کرائیں جس کا آڈٹ چارٹرڈ اکائونٹنٹ سے کرایا گیا ہو۔
الیکشن کمیشن کا مزید کہنا ہے کہ سیاسی جماعتوں کے اکائونٹس کی تفصیلات میں ان کی سالانہ آمدنی، اخراجات، فنڈز کے ذرائع، اثاثے اور واجبات کی تفصیلات درج ہونی چاہئیں۔
سیکشن 3 کے جز نمبر 2 کے تحت اکائونٹس کی تفصیلات ساتھ پارٹی لیڈر کا دستخط شدہ سرٹیفکیٹ بھی ہونا چاہیے جس میں یہ درج ہونا چاہیے کہ پارٹی نے کسی ایسے ذریعے سے فنڈز حاصل نہیں کیے جن کی اجازت پولیٹیکل پارٹیز آرڈر 2002 میں نہیں اور فراہم کی جانے والی تفصیلات بالکل درست ہیں۔
سیاسی جماعتوں کی جانب سے اکائونٹس کی تفصیلات فراہم کرنے کی آخری تاریخ ہر سال 29اگست ہوتی ہے لیکن الیکشن کمیشن میں رجسٹرڈ سیاسی جماعتوں کی جانب سے اسے نظر انداز کردیا گیا۔
الیکشن کمیشن کی جانب سے بھیجے جانے والے نوٹس میں کہا گیا ہے کہ 'وہ تمام سیاسی جماعتیں جو مقررہ وقت میں اپنے اکائونٹس کی تفصیلات جعم کرانے میں ناکام رہیں انہیں مطلع کیا جاتا ہے کہ وہ سیکشن 13 کی خلاف ورزی کی مرتکب ہوں گی اور جب تک وہ اکائونٹس کی تفصیلات فراہم نہیں کرتیں کسی بھی ضمنی انتخاب یا عام انتخابات میں اپنے پارٹی نشان کو استعمال کرنے کی اہل نہیں ہوں گی۔
*یہ خبر 4 ستمبر 2016 کو ڈان اخبار میں شائع ہوئی *