شارجہ: ویسٹ انڈیز نے کریگ بریتھ ویٹ کی عمدہ بیٹنگ کارکردگی کی بدولت عالمی نمبر دو پاکستان کو تیسرے ٹیسٹ میچ میں 5 وکٹوں سے شکست دے دی لیکن ابتدائی دو میچوں میں فتح کی بدولت سیریز 2-1 سے پاکستان کے نام رہی۔

ٹیسٹ کے آخری روز ویسٹ انڈیز نے بغیر کوئی وکٹ کھوئے ہدف کے بقیہ 39 رنز بناکر فتح کو یقینی بنایا۔

شارجہ ٹیسٹ کا پانچویں روز پاکستانی باولرز کیلئے کوئی بھی کامیابی نہیں لایا جبکہ تمام تر کوشش کے باوجود پاکستانی باؤلرز آخری روز ایک بھی وکٹ حاصل نہ کرسکے۔

بریتھویٹ اور ڈاؤرچ کی جوڑی نے ویسٹ انڈین ٹیم کو یادگار فتح دلوادی۔

26 سال بعد ویسٹ انڈیز پاکستان کے خلاف پاکستان یا یو اے ای میں کوئی ٹیسٹ جیتنے میں کامیاب ہوا۔

ویسٹ انڈیز کے ہیرو اوپنر کریگ بریتھویٹ رہے جنہوں نے پہلی اننگز میں بیٹ کیری کرنے کا اعزاز حاصل کیا، دوسری اننگز میں بھی وہ ناقابل شکست نصف سنچری کے ساتھ پاکستانی بالرز کے سامنے آہنی دیوار بنے رہے۔

کریگ بریتھ اور شین ڈاؤرچ نے دوسری اننگز 87 رنز کی عمدہ شراکت قائم کی اور 60، 60 رنز کی اننگز کھیلیں۔

بریتھ ویٹ میچ کے بہترین کھلاڑی قرار ہائے جبکہ سیریز کے بہترین کھلاڑی کا اعزاز 21 وکٹیں لینے والے یاسر شاہ نے حاصل کیا۔

یہ ویسٹ انڈیز کی موجودہ کپتان جیسن ہولڈر کی زیر قیادت ٹیسٹ کرکٹ میں پہلی کامیابی جبکہ 2007 کے بعد رینکنگ میں اپنے سے بہتر ٹیم کے خلاف بیرون ملک بھی پہلی فتح ہے۔

یاد رہے کہ پاکستان نے اپنی پہلی اننگز میں 281 رنز بنائے تھے اور جواب میں کریگ بریتھ ویٹ کی بیٹ کیری سنچری کی بدولت ویسٹ انڈیز نے پاکستان کے خلاف 56 رنز کی برتری حاصل کی تھی لیکن دوسری انگز میں پاکستانی بیٹنگ ناکام رہی اور 208 رنز بنا کر آؤٹ ہو گئی۔

دبئی اور ابوظہبی میں کھیلے گئے ابتدائی دونوں ٹیسٹ میچ جیت کر پاکستان پہلے ہی سیریز اپنے نام کر چکا تھا۔