کراچی: شارع فیصل پر واقع ریجنٹ پلازہ ہوٹل میں رات گئے لگنے والی خوفناک آگ نے خواتین و بچوں سمیت 11 افراد کی جانیں نگل لیں۔

ہوٹل کے گراؤنڈ فلور پر واقع کچن میں آتشزدگی نے ہوٹل کی 6 منزلوں کو اپنی لپیٹ میں لیا، جس پر تقریباً 3 گھنٹے بعد قابو پالیا گیا۔

زیادہ تر ہلاکتیں آتشزدگی کے باعث کئی گھنٹوں تک عمارت میں محصور رہنے کے باعث جھلسنے اور دم گھٹنے سے ہوئیں، واقعے میں 75 سے زائد افراد زخمی بھی ہوئے۔

آگ لگنے کے باعث ہوٹل میں موجود سیکڑوں ملکی و غیر ملکی افراد محصور ہوگئے، واقعے کے وقت کرکٹ کے عالمی کھلاڑی صہیب مقصود اور یو بی ایل اسپورٹس ٹیم بھی ہوٹل میں موجود تھی۔

ہوٹل میں مقیم کئی افراد نے کھڑکیوں سے چھلانگ لگا کر اپنی جان بچائی۔

وزیراعلیٰ سندھ سید مراد علی شاہ نے بھی واقعے کا نوٹس لے کر کمشنر کراچی کو رپورٹ پیش کرنے کا حکم جاری کردیا۔

دوسری جانب میئر کراچی وسیم اختر نے علی الصبح متاثرہ ہوٹل کا دورہ کیا اور آگ لگنے جیسے واقعات سے نمٹنے کے لیے نامناسب انتظامات پر برہمی کا اظہار کیا۔