ویسٹ انڈیز کرکٹ بورڈ نے مارچ کے وسط میں 2 ٹی ٹوئنٹی میچز کے لیے پاکستان کے مجوزہ دورے سے انکار کردیا۔

کرک انفو کی رپورٹ میں مختلف ذرائع کا حوالہ دیتے ہوئے کہا گیا کہ ویسٹ انڈیز کرکٹ بورڈ (ڈبلیو آئی سی بی) نے فیڈریشن آف انٹرنیشنل کرکٹرز ایسویسی ایشن (فیکا) کی جانب سے پاکستان کی سیکیورٹی کو مخدوش قرار دیئے جانے کے بعد پاکستان کرکٹ بورڈ (پی سی بی) کی تجویز کو مسترد کیا۔

ویسٹ انڈین کرکٹ بورڈ نے مجوزہ دورے کے سیکیورٹی معاملات کا جائزہ لینے کے لیے رواں ماہ اپنی معائنہ ٹیم بھی پاکستان بھیجنے کے امکان کو رد کردیا۔

تاہم دونوں کرکٹ بورڈز 19 اور 20 مارچ کو فلوریڈا میں 2 ٹی ٹوئنٹی انٹرنیشنل میچز کے ممکنہ انعقاد کے لیے ایک دوسرے سے رابطے میں رہیں گے۔

یہ بھی پڑھیں: کھلاڑیوں کو لاہور جانے سے منع نہیں کیا:فیکا

قبل ازیں رواں ہفتے ویسٹ انڈیز پلیئرز ایسوسی ایشن نے فیکا کو خط لکھا تھا، جس میں پاکستان کی موجودہ سیکیورٹی صورتحال کے حوالے سے ایڈوائس طلب کی گئی تھی۔

فیکا نے خط کے جواب میں اپنے سیکیورٹی کنسلٹنٹ ’ایسٹرن اسٹار انٹرنیشنل‘ سے حاصل ہونے والی حالیہ سیکیورٹی ایڈوائزری بھیجی، جو انگلش کرکٹ بورڈ، کرکٹ آسٹریلیا، نیوزی لینڈ کرکٹ اور انٹرنیشنل کرکٹ بورڈ (آئی سی سی) کے لیے بھی سیکیورٹی فراہم کرتی ہے۔

مزید پڑھیں: پی سی بی نے 'مخدوش سیکیورٹی' کے بیان کو مسترد کردیا

قبل ازیں پلیئرز کے تحفظ اور سیکیورٹی کے حوالے سے بھی فیکا کی رپورٹ میں پاکستان سپر لیگ (پی ایس ایل) کے لاہور میں 5 مارچ کو شیڈول فائنل میں غیر ملکی کھلاڑیوں کی شرکت کی حوصلہ شکنی کی گئی تھی۔

پاکستان کرکٹ بورڈ کی جانب سے ویسٹ انڈیز کرکٹ بورڈ کو فلوریڈا میں 2 میچز کے بعد لاہور میں 18 اور 19 مارچ کو دونوں ٹیموں کے درمیان دو ٹی ٹوئنٹی میچز کی تجویز دی گئی تھی۔