بولی وڈ کی کامیاب فلم سیریز ’ریس‘ کے تیسرے حصے پر کام کا آغاز ہوچکا ہے اور اس سیریز کی مکمل کاسٹ بھی تبدیل ہوچکی ہے۔

فلم ’ریس‘ اور ’ریس 2‘ میں سیف علی خان نے مرکزی کردار ادا کیا تھا، جبکہ انیل کپور بھی اہم رول میں نظر آئے، ان کے علاوہ دونوں فلموں کی کاسٹ بھی تبدیل ہوئی۔

مزید پڑھیں: ’ریس 3‘ میں سلمان خان کا مرکزی کردار فائنل

اب اس فلم کے تیسرے حصے میں نہ صرفسیف علی خان کی جگہ سلمان خان نے لے لی ہے، بلکہ ان کے ساتھ ساتھ بوبی دیول بھی اس فلم کی کاسٹ کا حصہ بن گئے۔

بوبی دیول نے ٹوئٹر پر اس فلم کا حصے بننے پر اپنی خوشی کا اظہار بھی کیا۔

اس فلم کی پروڈکشن رامیش ترانی کررہے ہیں۔

فلم سیریز کی دونوں فلموں کی ہدایات عباس اور مستان نے دی تھیں، جبکہ تیسری فلم کی ہدایات ریمو ڈی سوزا دے رہے ہیں۔

خیال رہے کہ فلم ’ریس‘ میں اکشے کھنہ اور کترینہ کیف منفی کرداروں میں نظر آئے تھے، جبکہ ہیروئن کا کردار بپاشا باسو نے ادا کیا تھا۔

دوسری جانب فلم ’ریس 2‘ میں جون ابراہم اور جیکولین فرنینڈز نے ولن کے کردار ادا کیے، اور دپیکا پڈوکون مرکزی اداکارہ کے روپ میں نظر آئیں۔

یہ بھی پڑھیں: ’ریس تھری‘ میں کام کے لیے سلمان کی انوکھی شرط

سلمان خان اس فلم میں ہیرو بنیں گے یا ولن یہ تو وقت بتائے گا، ان کے ساتھ جیکولین فرنینڈز مرکزی اداکارہ کا کردار ادا کرتی نظر آئیں گی۔

واضح رہے کہ سلمان خان اور جیکولین فرنینڈز ایک ساتھ 2014 کی کامیاب فلم ’کِک‘ میں کام کرچکے ہیں۔