’ ٹی وی و اداکاری کی وجہ سے ہی سیاست میں ہوں‘
بھارت کی اطلاعات و نشریات کی وزیر و ماضی کی کامیاب ٹی وی اداکارہ سمرتی ایرانی نے اعتراف کیا ہے کہ وہ آج سیاست میں ٹی وی اور اداکاری کے باعث ہی ہیں۔
خیال رہے کہ 41 سالہ سمرتی ایرانی سیاست میں آنے سے قبل ٹی وی کی معروف اداکارہ رہی ہیں، انہوں نے مشہور ڈرامہ ’کیوں کہ ساس بھی کبھی بہو تھی‘ سمیت کم سے کم 15 ٹی وی ڈراموں، تین فلموں اور متعدد تھیٹرز میں اداکاری کے جوہر دکھائے۔
انہوں نے اداکاری کی شروعات 2000 سے کی، تاہم انہیں شہرت 2007 سے ’کیوں کہ ساس بھی کبھی بہو تھی‘ میں کام کرنے کی وجہ سے ملی۔
انہیں اداکاری کے باعث متعدد ٹی وی ایوارڈز بھی دیے گئے، وہ ماضی میں مس انڈیا کے مقابلوں میں بھی شریک رہیں۔
سمرتی ایرانی اس وقت بھارتی ریاست گجرات سے بھارتی راجیہ سبھا کی رکن پارلیمنٹ ہیں، وہ ہندوستان کی اطلاعات و نشریات کی وزیر سمیت ٹیکسٹائل کی بھی وزیر ہیں۔
این ڈی ٹی وی نے اپنی خبر میں بتایا کہ سمرتی ایرانی نے انڈین ٹیلی وژن اکیڈمی (آئی ٹی اے) کی ایوارڈ تقریب سے خطاب کرتے ہوئے اعتراف کیا کہ پروڈیوسر ایکتا کپور نے انہیں اپنی ٹیم کی مخالفت کے باوجود ’کیوں کہ ساس بھی کبھی بہو تھی‘ ڈرامے کے لیے منتخب کیا۔
سمرتی ایرانی نے بتایا کہ ایکتا کپور کی ٹیم نے انہیں ڈرامے کے کردار کے لیے ناموزوں قرار دیا، جب کہ ان کے مقابلے کئی نوجوان لڑکیاں بھی آڈیشن دینے آئیں، مگر ایکتا کپور نے پھر بھی انہیں چانس دیا۔
یہ بھی پڑھیں: اداکارہ و سیاست سمرتی ایرانی کی ڈگری جعلی
ماضی کی اداکارہ کا کہنا تھا کہ انہوں نے 20 سالوں تک اداکاری کی، اور اس کی وجہ سے ہی آج سیاست میں ہیں۔
انہوں نے ماضی کو یاد کرتے ہوئے بتایا کہ 2007 میں جب انہوں نے انڈین ٹیلی وژن ایوارڈ تقریب کی میزبانی کے فرائض انجام دیے تھے تو انہوں نے بھارت کے وزیر اطلاعات و نشریات کو اسٹیج پر مدعو کیا تھا، مگر وقت کی تبدیلی کے بعد آج انہیں کسی اور میزبان نے وزیر اطلاعات و نشریات کی حیثیت سے مدعو کیا۔
انہوں نے ٹی وی ڈرامے ’کیوں کہ ساس بھی کبھی بہو تھی‘ میں اداکاری کا چانس دینے کے لیے ایکتا کپور کا بھی شکریہ ادا کیا۔
مزید پڑھیں: سمرتی ایرانی بارہویں پاس، مگر تعلیم کی وزیر منتخب
ایوارڈ تقریب سے پروڈیوسر ایکتا کپور سمیت دیگر اداکاروں اور پروڈیوسرز نے بھی خطاب کیا، ایکتا کپور نے بھی سمرتی ایرانی کی اداکاری اور دوستی کی تعریف کی۔
ایوارڈ تقریب میں کامیاب ڈراموں، سیریلز، پروڈیوسرز اور اداکاروں کو بھی ایوارڈز دیے گئے، ایکتا کپور نے بھی ایک ایوارڈ حاصل کیا۔
ایوارڈ تقریب میں سمرتی ایرانی اور ایکتا کپور کو کافی دیر تک ایک ساتھ دیکھا گیا، یکتا کپور نے ان کے ساتھ کھینچی گئی تصاویر بھی سوشل میڈیا پر شیئر کیں، جب کہ سمرتی ایرانی نے بھی اپنے ٹوئٹر اور انسٹاگرام پر تصاویر کو شیئر کیا۔