عامرخان اوشو اور عالیہ بھٹ شیلا بنیں گی؟
مسٹر پرفیکشنسٹ عامر خان جو ان دنوں اپنی آنے والی میگا بجٹ فلم ’ٹھگس آف ہندوستان‘ کی شوٹنگ میں مصروف ہیں، ان سے متعلق گزشتہ کچھ عرصے سے چہ مگوئیاں ہیں کہ وہ متعدد بڑی فلمیں بنانے کی تیاریوں میں مصروف ہیں۔
اطلاعات ہیں کہ عامر خان ہندو ازم کی کہانی ’مہا بھارت‘ سمیت دیگر اہم موضوعات پر فلمیں بنانے اور ان میں کام کرنے کا ارادہ رکھتے ہیں۔
یہ خبریں بھی آئی تھیں کہ عامر خان جلد ہی ایک بائیوگرافی فلم میں بھارت کی میوزک کمپنی ’ٹی سیریز‘ کے سربراہ آنجہانی گلشن کمار کا کردار ادا کرتے نظر آئیں گے۔
اس کے ساتھ ہی اطلاعات بھی تھیں کہ عامر خان بھارت کے متنازع ترین ہندو گرو رجنیش اوشو کی زندگی پر بننے والی ایک فلم میں ان کا کردار ادا کرتے نظر آئیں گے۔
اب ایک بار پھر اس حوالے سے خبریں سامنے آئی ہیں کہ عامر خان جلد ہی پروڈیوسر کرن جوہر کی فلم میں متنازع ہندو گرو بھگوان رجنیش اوشو کا کردار ادا کرتے نظر آئیں گے۔
یہ بھی پڑھیں: عامر خان اوشو کے روپ میں؟
بولی وڈ ہنگامہ نے ذرائع سے اپنی رپورٹ میں بتایا کہ اطلاعات ہیں کہ رجنیش اوشو کی زندگی پر فلم بنانے کے حوالے سے منصوبہ بندی کا کام جاری ہے، جسے رواں برس کے آخر تک مکمل کرلیا جائے گا۔