کراچی میں گزشتہ روز مزار قائد سے ملحقہ باغ جناح میں متحدہ مجلس عمل (ایم ایم اے ) نے انتخابی جلسے کا انعقاد کیا جس میں بڑی تعداد میں مذہبی جماعتوں کے کارکنان نے شرکت کی۔

جلسے سے خطاب کرتے ہوئے مولانافضل الرحمٰن نے کہا کہ پاکستان میں مغرب اور امریکا کے تسلط کو قبول نہیں کرسکتے۔

ملک میں دہشت گردی کے واقعات پر تشویش کا اظہار کرتے ہوئے ان کا کہنا تھا کہ ہم عدالت کے نااہل کو نااہل کہتے ہیں حالانکہ جو جان کو تحفظ نہ دے سکے وہ بھی نااہل ہے۔

امیر جماعت اسلامی اور رہنما ایم ایم اے سراج الحق نے اپنے خطاب میں کہا کہ مسلم لیگ (ن) اور پیپلزپارٹی (پی پی پی) اسلامی نظریات کی حفاظت میں ناکام رہی ہیں اور جب ہم اسلامی مملکت کی بات کرتے ہیں تو طرح طرح کے سوالات کیے جاتے ہیں۔

اس موقع پر متحدہ مجلس عمل کے دیگر رہنماؤں نے بھی خطاب کیا جس میں مولانا عبدالغفور حیدری، انس نورانی، حافظ نعیم الرحمٰن شامل تھے۔