روایات سے ہٹ کر منفرد کہانی پر مشتمل پاکستانی ڈرامہ
پاکستانی ڈراموں میں آپ نے اکثر خواتین کو مشکلات کا شکار دیکھا ہوگا جبکہ مردوں کو عام طور پر دوسروں پر غالب رہنے یا کسی لڑکی کے پیچھے گھومتے ہی دکھایا جاتا ہے، تاہم ایک نیا ڈرامہ ان تمام روایات سے ہٹ کر منفرد کہانی کو بیان کررہا ہے۔
'بابا جانی' نامی ڈرامے کے آغاز کو 2 ہفتے ہی ہوئے ہیں، مگر اس کی کہانی ان لوگوں کو ضرور پسند آئے گی جو روایتی ڈراموں کو دیکھ دیکھ کر بیزار ہوچکے ہیں۔
معروف اداکار فیصل قریشی کی پروڈکشن کمپنی نے اس ڈرامے کو تیار کیا ہے جو ایک ایسے شخص کی کہانی بیان کرتا ہے جو اپنی ذمہ داریوں کو ہر صورت پورا کرنے کے لیے جدوجہد کررہا ہے۔
مزید پڑھیں : فیصل قریشی کا نیا ڈرامہ کیسا ہوگا؟
فیصل قریشی اس ڈرامے میں اسفند نامی شخص کا کردار ادا کررہے ہیں، جس کی ایک بڑی اور 2 چھوٹی بہنیں ہیں، جن کے مطالبات پورے کرنا اس کی زندگی کو مشکل بناتا ہے۔
ڈرامے میں صبا حمید (نجیبا) بڑی بہن ، جبکہ جنان حسین (نائلہ) اور عدیلہ خان (نبیلہ) نے فیصل قریشی کی چھوٹی بہنوں کے کردار ادا کیے ہیں۔
ڈرامے میں فیصل قریشی کی محبت اور ان کی کزن مہوش کا کردار فریال محمود نے ادا کیا ہے، جس کی ان سے منگنی بھی ہوجاتی ہے، مگر بعد ازاں ان کی یہ رشتہ ہی ختم کروا دیتی ہے، جس کا علم اسفند کو بھی ہوجاتا ہے۔
جس پر وہ مہوش کو الوداعی پیغام بھیجتا ہے جو کہ بامقصد ہونے کے ساتھ روایتی ڈراموں سے کافی ہٹ کر ہے۔
دوسری جانب سویرا ندیم کو ایک بیوہ سعدیہ کے روپ میں دکھایا گیا ہے جبکہ مدیحہ امام نے ان کی بیٹی نمرہ کا کردار ادا کیا ہے۔
اسفند جب پہلی بار نمرہ کو دیکھتا ہے (وہ نمرہ کے لیے رشتہ لے کر جاتا ہے)، تو وہ اسے انتہائی کم عمر ہونے کے باعث اپنی چھوٹی بہن کی طرح لگتی ہے،جس کے بعد وہ اس کے سر پر ہاتھ رکھ کر چلاجاتا ہے اور اسے مضبوط چھت فراہم کرنے کی خواہش کا اظہار کرتا ہے۔