Dawn News Television

اپ ڈیٹ 22 نومبر 2018 08:46pm

عدالت کا ٹی10 لیگ کی فرنچائز کو نام تبدیل کرنے کا حکم

سندھ ہائی کورٹ نے ٹی10 لیگ کو ’کراچینز‘ نامی فرنچائز کا نام تبدیل کرنے کا حکم دیتے ہوئے شہر کراچی سے مماثل کوئی بھی نام نہ رکھنے کی ہدایت کی ہے۔

متحدہ عرب امارات میں ہونے والی ٹی10 کا دوسرا ایڈیشن رواں سال منعقد ہو گا اور گزشتہ ایڈیشن کی کامیابی کے بعد اس مرتبہ ٹیموں کی تعداد 6 سے بڑھا کر 8کردی گئی ہے۔

جن دو ٹیموں کا اضافہ کیا گیا ہے ان میں سے ایک فرنچائز کا نام شہر قائد کراچی کے نام پر کراچینز(Karachians) رکھا گیا ہے جس پر پاکستان سپر لیگ کی فرنچائز کراچی کنگز نے اعتراض کرتے ہوئے عدالت سے رجوع کیا تھا۔

ستمبر میں ٹی10 لیگ کے صدر کے عہدے سے استعفیٰ دینے والے کراچی کنگز کے مالک سلمان اقبال نے تحریری درخواست دائر کرتے ہوئے عدالت سے نام تبدیل کرانے کی استدعا کی تھی۔

عدالت نے مقدمے کی سماعت کرتے ہوئے اس بات کا مشاہدہ کیا کہ اصل مسئلہ شہر یا اس سے منسلک کسی بھی چیز کے نام کا استعمال ہے اور اس چیز کو مدنظر رکھتے ہوئے عدالت نے ٹی10 لیگ کی فرنچائز کو حکم دیا کہ وہ شہر کراچی یا اس سے مماثل کسی بھی قسم کا نام استعمال نہ کریں۔

اس کے ساتھ ساتھ عدالت نے مزید کہا کہ ٹی10 فرنچائز اپنے نام کے ساتھ کنگ کا نام بھی استعمال نہیں کر سکتے بلکہ وہ اپنے لوگو میں بھی کسی ایسی چیز کا استعمال نہیں کر سکتے جو کراچی کنگز کے لوگو یا شہر سے کسی طرح مشابہت رکھتی ہو۔

یہاں یہ باقات قابل ذکر ہے کہ متحدہ عرب امارات میں ہونے والے کاروبار یا سرگرمیوں کے خلاف پاکستانی عدالت کسی قسم کی قانونی کارروائی کا حق محفوظ نہیں رکھتی لیکن اس کے باوجود ٹی10 لیگ کے چیئرمین نواب شجیع الملک نے عدالتی احکامات کو مانتے ہوئے فرنچائز کا نام تبدیل کرنے پر رضامندی ظاہر کردی ہے۔

Read Comments