جوہانسبرگ میں جیت کا سلسلہ تھم گیا
پاکستان کو جنوبی افریقہ کی مضبوط ٹیم نے دوسرے ٹی ٹوئنٹی میں بھی شکست دے کر ٹی ٹوئنٹی سیریز میں مسلسل فتوحات کا سلسلہ توڑ دیا۔
جوہانسبرگ میں کھیلے گئے میچ میں جنوبی افریقہ اور پاکستان دونوں ٹیمیں قائم مقام کپتانوں کے ساتھ میدان میں اتریں اور دونوں ٹیموں کے ابتدائی بلے بازوں نے بہترین کھیل کا مظاہرہ کیا۔
جنوبی افریقہ کے کپتان ڈیوڈ ملر نے برق رفتار 65 رنز بنا کر پاکستان کو189 رنز کا ایک مشکل ہدف دیا جس میں وین دیرڈوسین نے 45 رنز بنا کر ان کا بھرپور ساتھ دیا تھا۔
پاکستان کے ابتدائی بلے بازوں نے اس ہدف کے حصول کو ممکن بنانے کی بھرپور کوشش کی جس میں بابراعظم نے شاندار بلے بازی کا مظاہرہ کیا اور 90 رنز کی اننگز کھیلی، ان کے ساتھ حسین طلعت نے 55 رنز بنائے اور فخرزمان 14 رنز بنا کر آؤٹ ہوئے جس کے بعد کوئی بلے باز دوہرے ہندسے کو بھی عبور نہ کرپایا اور مقررہ اوورز میں ٹیم نے 181 رنز بنائے۔
جنوبی افریقہ نے پاکستان کو 7 رنز سے شکست دی تو سیریز بھی ان کے ہاتھ میں آگئی اور دوسری طرف پاکستان کو طویل عرصے سے ٹی ٹوئنٹی سیریز میں ناقابل شکست رہنے کے سلسلے سے ہاتھ دھونا پڑا۔