بچوں میں چیخنے کی عادت کو کیسے ختم کیا جائے؟

Parenting

بچوں میں چیخنے کی عادت کو کیسے ختم کیا جائے؟

بچوں کو آواز دھیمی کروانے کے لیے آپ کے چلانے سے کوئی فائدہ نہیں ہوگا۔ہم آپ کے لیے اس حوالے سے چند تجاویز پیش کرتے ہیں

ڈان اخبار

چھوٹے بچے والدین کو متوجہ کرنے کے لیے چیختے چلاتے ہیں۔ ان کے لیے چلانا بالکل ایسا ہی ہے جیسے کسی کو یہ کہنا کہ، ’ادھر میری طرف دیکھو!‘ چند بچے اس لیے چیختے ہیں کہ ان کی بات ان کی مرضی کے مطابق مانی جائے یعنی ان بچوں کے لیے چیخنا چلانا اس جملے کے برابر ہوتا ہے کہ، ’یہ چیز مجھے دو، میں اپنی مرضی کے مطابق اس کا استعمال کروں گا۔‘

چند بچے صرف اپنی خوشی کے جذبات کا اظہار اپنی آواز میں شدت لاکر کرتے ہیں۔ 12 سے 36 ماہ کے بچوں کو اپنی آواز کی طاقت جاننے کا بہت شوق ہوتا ہے اور وہ اکثر یہ تجربہ بھی کرتے ہیں کہ اس تیز آواز کا استعمال کیسے کیا جائے۔

چیخنے چلانے کی عادت سے چھٹکارہ کیسے حاصل کیا جائے؟

بچوں کے چیخنے پر انہیں آواز دھیمی کرنے کے لیے آپ کے چلانے سے کوئی فائدہ نہیں ہوگا بلکہ اس طرح بچے کو یہ پیغام جائے گا کہ جس کی جتنی تیز آواز وہ اتنا بڑا سکندر۔ سب سے بہتر عمل یہ ہے کہ ایسی کوئی صورتحال پیدا ہی نہ ہونے دیں جو آپ کے بچے کے چیخنے یا چلانے کا باعث بنتی ہو اور جب بچہ چیخنے لگے تو اس کا دھیان دوسری چیزوں کی طرف منتقل کرنے کی کوشش کریں۔

اس حوالے سے مندرجہ ذیل چند تجاویز پیش کی جاتی ہیں:

بچوں کے شیڈول کا خیال رکھتے ہوئے باہر کے کام نپٹائیں

ہمیشہ اپنے بچے کے آس پاس رہتے ہوئے کام کرنا ممکن نہیں ہوتا، لیکن آپ جب بھی گھر سے باہر نکلیں تو یہ بات یقینی بنائیے کہ آپ کا بچے نے مناسب وقت تک آرام کیا ہو اور اس کا پیٹ بھرا ہوا ہو۔

شور والی جگہوں پر ہی جائیں

جب آپ باہر ہوں اور آپ کے ساتھ آپ کا بچہ ہو تو کھانے کی ایسی پرسکون کھانے کی جگہ پر جانے سے گریز کریں جہاں لوگ آپس میں دھیمی آواز سے بات کرتے ہوں بلکہ ایسی جگہ کو فوقیت دیجیے جہاں لوگ فیملیز بالخصوص چھوٹے بچوں کے ہمراہ آتے ہوں، کیونکہ ایسی جگہوں پر آپ کا بچہ چیخنا بھی شروع کردے تو بھی شور والی جگہ ہونے کے باعث آپ کو زیادہ شرمساری محسوس نہیں ہوگی اور ایسے ماحول میں بچوں کو چپ کرانے کی کوششوں کے دوران اس کے چخنے چلانے والے رویے کو تقویت بھی نہیں ملتی۔

بچوں کو دھیمی آواز کا استعمال کرنے کے لیے کہیں

اگر آپ کا چھوٹا بچہ خوشی کے جذبات کے ساتھ چیخ رہا ہے تو اس پر کوئی تبصرہ یا تنقید نہ کرنے کی کوشش کریں۔ لیکن اگر بچے کی آواز آپ کو بہت ہی زیادہ بیزار کر رہی ہے تو اسے دھیمی آواز میں بات کرنے کے لیے کہیے۔ اس کے علاوہ آپ اپنی آواز بھی دھیمی کرلیں تاکہ وہ آپ کی بات سننے کے لیے چیخنا بند کردے۔

چیخنے چلانے کا کھیل

بچے کو کہیے کہ، چلو دیکھتے ہیں کہ ہم کتنی زور سے چیخ مارسکتے ہیں؟ اور پھر اس کے ساتھ چیخ بھی ماریے۔ اب آپ بچے کو آواز دھیمی کرنے پر قائل کریں۔ آپ اس سے یہ کہیں کہ، چلو دیکھتے ہیں کہ سب سے زیادہ بہتر انداز میں سرگوشی میں بات کون کرتا ہے۔

ظاہر ہے کہ اس قسم کا کھیل گھر کے اندر یا باہر دونوں جگہ اہنا کام دکھا سکتا ہے لیکن اگر آپ لوگوں کے درمیان ہیں تو آپ زیادہ دھیمی آواز والے کھیلوں کا انتخاب کریں۔ مثلاً، بچے کو کہیے کہ، ارے تمہاری آواز تو شیر جیسی ہے! کیا تم مجھے بلی کے بچے جیسی آواز نکال کر دکھا سکتے ہو۔