پاکستان کرکٹ ٹیم کے فاسٹ باؤلر محمد عامر وائرل انفیکشن کا شکار ہوگئے، جس کے باعث ان کی ورلڈکپ اسکواڈ میں شرکت بھی مشکوک ہوگئی ہے۔

کرک انفو کی رپورٹ کے مطابق محمد عامر پاکستان ٹیم کے ہمراہ اس وقت ٹیم کے دورہ انگلینڈ میں موجود ہیں، جہاں انہیں پہلے میچ میں ٹیم کا حصہ بنایا گیا لیکن دوسرے میچ میں انہیں ڈراپ کردیا گیا تھا۔

امکان ظاہر کیا جارہا ہے کہ محمد عامر کو جو انفیکشن لاحق ہوا ہے وہ ممکنہ طور پر ’چکن پوکس‘ ہے۔

مزید پڑھیں: کرکٹر محمد عامر کی والدہ انتقال کرگئیں

کرک انفو کے مطابق ممکنہ طور پر انگلینڈ کے خلاف ہونے والے ہونے والے تیسری ون ڈے میں بھی محمد عامر کو ٹیم میں شامل نہیں کیا جائے گا کیونکہ وہ ٹیم کو چھوڑ کر لندن میں اپنے اہلِ خانہ کے پاس چلے گئے۔

ابھی تک یہ بات بھی سامنے نہیں آئی کہ ان کی بیماری کو ختم ہونے میں مزید کتنا وقت لگے گا، تاہم کرکٹ تجزیہ نگاروں کا ماننا ہے کہ انہیں ورلڈکپ اسکواڈ میں شامل کرلیا جائے گا۔

اس حوالے سے ڈان نیوز کے پروگرام ری پلے میں گفتگو کرتے ہوئے اسپورٹس جرنلسٹ عبدالغفار کا کہنا تھا کہ پی سی بی ذرائع کے مطابق محمد عامر کو اس وقت انگلینڈ کے خلاف ہونے والی سیریز سے بھی باہر نہیں کیا گیا ہے۔

یہ بھی پڑھیں: ورلڈ کپ کے لیے پاکستان ٹیم کا اعلان، محمد عامر ڈراپ

واضح رہے کہ محمد عامر کو پاکستان کرکٹ بورڈ (پی سی بی) کی سلیکشن کمیٹی نے ورلڈکپ کے عبوری اسکواڈ کا حصہ نہیں بنایا تھا جبکہ امکان ظاہر کیا جارہا تھا کہ انگینڈ کے خلاف ہونے والی سیریز میں ان کی کارکردگی ورلڈکپ کے حتمی اسکواڈ میں ان کی شمولیت سے مشروط ہوگی۔