دنیا بھر کی طرح پاکستان میں بھی آج جمعۃ الوداع کے موقع پر 'یوم القدس' منایا گیا۔

یوم القدس منانے کا مقصد فلسطینی عوام سے اظہار یکجہتی اور بیت المقدس کی آزادی کے لیے کوششیں جاری رکھنا ہے۔

یوم القدس کے موقع پر کراچی سمیت ملک کے مختلف شہروں میں ریلیاں نکالی گئیں، سیمنارز اور احتجاجی مظاہرے منعقد کیے گئے۔

کراچی میں ہونے والی القدس کانفرنس میں مختلف سیاسی و مذہبی جماعتوں کے رہنماؤں نے شرکت کی، جس میں خطاب کرتے ہوئے مقررین نے فلسطین میں اسرائیلی جارحیت کو افسوسناک قرار دیا۔

یوم القدس کے سلسلے میں مرکزی 'تحریک آزادی القدس' ریلی سی بریز پلازہ سے تبت سینٹر تک نکالی گئی۔

دیگر چھوٹے بڑے شہروں میں بھی بیت المقدس کی آزادی کے لیے ریلیاں نکالی گئیں، جس میں لوگوں کی بڑی تعداد نے شرکت کی۔