آسکر اور گولڈن گلوب ایوارڈز کے بعد اہم ترین برٹش فلم ایوارڈز ’دی برٹش اکیڈمی آف فلم اینڈ ٹیلی وژن آرٹس‘ (بافٹا) کی 73 ویں سالانہ تقریب میں جنگ عظیم پر بنی برطانوی فلم ’1917‘ نے 7 بڑے ایوارڈز جیت کر میلہ لوٹ لیا۔

بافٹا سے قبل ’1917‘ نے آسکر کے بعد دوسرے بڑے اہم ایوارڈز ’گولڈن گلوب‘ میں بھی بہترین ڈراما فلم کا ایوارڈ اپنے نام کیا تھا۔

جنگ عظیم اول پر بنی اس فلم کو بافٹا کے لیے مجموعی طور پر 9 نامزدگیاں ملی تھیں جن میں سے فلم نے 7 ایوارڈ اپنے نام کیے۔

’1917‘ نے بہترین فلم، بہترین ڈائریکٹر اور بہترین برطانوی فلم‘ کے بڑے ایوارڈز اپنے نام کیے۔

یہ بھی پڑھیں: ’جوکر‘ 11 نامزدگیوں کے ساتھ بافٹا ایوارڈز میں سرفہرست

چوں کہ بافٹا ایوارڈز برطانوی فلم اکیڈمی کی جانب سے دیے جاتے ہیں اس لیے اس فلم کو بہترین برطانوی فلم کا ایوارڈ بھی ملا۔

خبر رساں ادارے ’ایسوسی ایٹڈ پریس‘ (اے پی) کے مطابق بافٹا ایوارڈز کی 73 ویں سالانہ تقریب لندن میں منعقد ہوئی جس میں برطانوی شہزادہ ولیم اپنی اہلیہ کیٹ مڈلٹن سمیت دیگر اہم شخصیات نے بھی شرکت کی۔

ایوارڈز تقریب میں مجموعی طور پر 25 کیٹیگریز میں ایوارڈز دیے گئے۔

بہترین اداکار کا ایوارڈ گزشتہ سال ریلیز ہونے والی تھرلر کامیڈی فلم ’جوکر‘ کے ہیرو جیکوئن فیونکس جب کہ بہترین اداکارہ کا ایوارڈ فلم ’جوڈی‘ کی اداکارہ رنی زلوگر کو دیا گیا۔

بہترین غیر ملکی فلم کا ایوارڈ جنوبی کورین فلم ’پیراسائٹ‘ لے اڑی، تقریب میں بہترین دستاویزی فلم، بہترین اینیمیٹڈ فلم، بہترین منظر نگاری، ساؤنڈ ٹریک اور کاسٹنگ سمیت مجموعی طور پر 25 کیٹیگریز میں ایوارڈز دیے گئے جن میں اہم ایوارڈز درج ذیل ہیں۔

بہترین فلم

1917

بہترین اداکار

جیکوئن فیونکس - جوکر

بہترین اداکارہ

رنی زلوگر - جوڈی

بہترین ہدایت کار

سام مینڈس - 1917

بہترین معاون اداکار

بریڈ پٹ - ونس اپن ٹائم ان ہولی وڈ

بہترین معاون اداکارہ

لارا ڈیرن - دی میریج اسٹوری

بہترین برطانوی فلم

1917

بہترین غیر ملکی زبان کی فلم

پیراسائیٹ - جنوبی کوریا