اداکارہ عائزہ خان کے بعد ایمن خان بھی پاکستان میں انسٹاگرام پر 80 لاکھ فالوورز والی اداکارہ بن گئیں۔

عائزہ خان گزشتہ ماہ جنوری کے اختتام پر انسٹاگرام پر پاکستان میں سب سے زیادہ فالو کی جانے والی شخصیت بنی تھیں اور ان کے فالوورز کی تعداد 80 لاکھ ہوگئی تھی۔

عائزہ خان نے حیران کن طور پر 2020 کی آخری سہ ماہی میں انسٹاگرام پر کافی مقبولیت حاصل کرتے ہوئے ایمن خان کی بادشاہی کو ختم کیا تھا۔

سال 2020 کی آخری سہ ماہی میں انسٹاگرام پر اگرچہ ایمن خان فالوورز میں 74 لاکھ کے ساتھ پہلے نمبر پر تھیں، تاہم دسمبر 2020 تک عائزہ خان فالوورز کے حوالے سے ان کے برابر ہوگئی تھیں۔

دسمبر 2020 کے اختتام تک ایمن اور عائزہ خان کے فالوورز کی تعداد ترتیب وار 78 لاکھ ہوگئی تھی، تاہم سال 2021 کے پہلے ہی مہینے عائزہ خان نے نیا اعزاز حاصل کرتے ہوئے ایمن خان کو پیچھے چھوڑ دیا تھا۔

جنوری 2021 کے اختتام پر عائزہ خان 80 لاکھ فالوورز کے ساتھ پہلی شوبز شخصیت بنیں تھیں جن کے سوشل شیئرنگ ایپ پر اتنے فالوورز تھے۔

تاہم اب دو ہفتوں بعد ایمن خان بھی فالوورز کے حوالے سے عائزہ خان کے برابر ہوگئیں۔

10 فروری 2021 کو ایمن خان کے انسٹاگرام فالوورز کی تعداد 8 ملین یعنی 80 لاکھ ہوگئی جب کہ عائزہ خان کے اتنے ہی فالوورز 29 جنوری کو ہوگئے تھے۔

اب بھی اگرچہ عائزہ خان کچھ ہزار فالوورز سے ایمن خان سے آگے ہوں گی، تاہم ایمن خان نے بھی 80 لاکھ فالوورز کا ہندسہ عبور کرلیا۔

انسٹاگرام پر 80 لاکھ فالوورز ہونے پر عائزہ خان نے بعد ازاں سوشل میڈیا پوسٹ میں کہا تھا کہ زیادہ فالوورز کامیابی کی ضمانت نہیں ہیں، تاہم وہ فالو کیے جانے پر مداحوں کی شکر گزار ہیں۔

ریکارڈ فالوورز ہوجانے پر تاحال ایمن خان نے کوئی پوسٹ نہیں کی، تاہم امکان ہے کہ وہ بھی جلد مداحوں کے لیے پوسٹ شیئر کریں گی۔

مذکورہ دونوں اداکاراؤں کے بعد 70 لاکھ فالورز کے ساتھ ماہرہ خان تیسرے نمبر پر ہیں.

سجل علی 69 لاکھ فالوورز کے ساتھ چوتھے اور منال خان 65 لاکھ فالوورز کے ساتھ سرفہرست فالو کی جانے والی شخصیات میں شامل ہیں۔

دنیا کے دیگر ممالک کی طرح پاکستان میں بھی گزشتہ کچھ عرصے سے شوبز شخصیات کی جانب سے دیگر پلیٹ فارمز کے مقابلے انسٹاگرام کو استعمال کیے جانے میں اضافہ دیکھا جا رہا ہے۔